Shkarkimi i Metës në Kuvend – 5 orë mocion të enjten, PS: Po pengon zgjedhjet në mënyrë të kundraligjshme
Konferenca e Kryetarëve e thirrur të martën nga kryetari i Kuvendit Gramoz Ruçi ka vendosur të shqyrtojë në seancën plenare të së enjtes mocionin për shkarkimin e Presidentit Ilir Meta. Mocioni është parashikuar të shtrihet në 5 orë debate, në të cilat mazhoranca do të ketë në dispozicion 170 minuta ndërsa opozita bashkë me deputetët e pavarur 130 minuta.
Mbledhja e Konferencës së Kryetarëve ashtu si dhe vendimi për mocionin e së enjtes erdhën si pasojë e dy kërkesave të Partisë Socialiste, e cila vetëm një ore pasi Presidenti Ilir Meta nënshkroi dekretin për anulimin e zgjedhjeve të 30 qershorit, bëri publik vendimin për shkarkimin e tij. Po gjatë së hënës, Grupi Parlamentar Socialist ju drejtua Kuvendit me një projektrezolutë mbi aktin e presidentit dhe një kërkesë për mocion nga ana e Kryetarit të tij Taulant Balla.
Të dy dokumentet shprehen me tone mjaft të ashpra lidhur me vendimin e Presidentit Ilir Meta për anulimin e zgjedhjeve. Në kërkesën për mocion, Balla e përkufizoi vendimin e Presidentit si një akt synon te pengoje ne mënyre te kundra ligjshme realizimin e se drejtës kushtetuese te shtetasve shqiptare per te zgjedhur përfaqësuesit e tyre ne pushtetin vendor.
Ndërkohë që të njëjtat tone të ashpra përmban edhe projektrezoluta e Grupit Socialist. “Akti i Presidentit, në mënyrë të kundërligjshme, ka për qëllim ndërhyrjen në një proces zgjedhor tashmë të shpallur dhe të administruar sipas kritereve, kushteve dhe afateve të parashikuara në Kodin Zgjedhor, ashtu si është procesi i nisur për organizimin dhe administrimin e zgjedhjeve të datë 30 qershor 2019;
Ky akt tenton të ndërhyjë drejtpërdrejt në një proces që tashmë është në kompetencë të organit administrues të tij dhe si i tillë duhet shqyrtuar dhe vlerësuar nga organet e administrimit zgjedhor theksohet në projekrezolutë.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.