Shkarkimi, Kuvendi: Meta të paraqitet të enjten – Vasilika Hysi: Presidenti shkeli Kushtetutën, shkaktoi dhunë, prishi imazhin e Shqipërisë

Komisioni Parlamentar i Ligjeve I ka dhënë kohë deri të enjten Presidentit të Republikës të shprehet për procesin e shkarkimit të nisur ndaj tij, në një kohë që vetë Kreu i Shtetit kishte kërkuar që kjo dëgjesë të zhvillohej më datë 10 maj. Komisioni u mblodh të mërkurën për të prezantuar relacionin e 49 deputetëve që kanë kërkuar shkarkimin dhe për të miratuar hapat e mëtejshëm që do çojnë në ngritjen e komisionit hetimor.

Nënkryetarja e Kuvendit Vasilika Hysi tha se Presidenti ka cenuar nenin 92 dhe 94 të Kushtetutës, duke kryer shkelje të rënda flagrante, dasi e përçarje në popull, duke nxitur dhunë, duke nxitur militantët e terrorizuar njerëzit, sjellje që u pasuan deri humbje jete të një njeriu e plagosje të disa të tjerëve.

Një prej relatorëve të kërkesës për shkarkim, Ervin Bushati, tha se ky veprim do shërbejë edhe si precedent për të mos lejuar që Institucioni i Presidentit në të ardhmen të shkelë kushtetutën.

Në fund të mbledhjes Kreu i Komisionit të Ligjeve Ulsi manja caktoi të enjten si ditën e dëgjesës me Presidentin, nga ku më pas do të nisin dhe procedurat për ngritjen e komisionit hetimor.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.