“Shkelja e rregullave në qarkullimin rrugor”, policia vendos 634 masa për drejtuesit e mjeteve: Ditët në vijim, ndëshkime për qytetarët

Në vijim të punës për rritjen e parametrave të sigurisë rrugore, Policia Rrugore e Tiranës ka intensifikuar punën, për parandalimin dhe ndëshkimin e shkelësve të rregullave të qarkullimit rrugor, kryesisht atyre që qarkullojnë me shpejtësi tej normave të lejuara, parakalimet dhe manovrimet e gabuara në rrugë, atyre që drejtojnë mjetin nën ndikimin e alkoolit, apo në gjendje të dehur, atyre pa leje drejtimi, pa vendosur rripin e sigurimit, pa kaska mbrojtëse, shkeljet e semaforit, rastet e mitdhënies, etj.

Kështu gjatë 24 orëve të fundit, në territorin e qarkut Tiranë, shërbimet e Policisë Rrugore kanë vendosur gjithsej 634 masa administrative për shkelje të ndryshme të Kodit Rrugor, nga këto:

66 masa për mosvendosje të rripit të sigurimit,

42 masa për mospërdorim të kaskave mbrojtëse,

37 masa për përdorim të celularit gjatë drejtimit të mjetit,

30 masa për shpejtësi tej normave të lejuara,

25 masa për parakalim të gabuar,

11 masa për shkelje të semaforit,

10 masa për drejtim mjeti nën ndikimin e alkoolit, dhe pjesa tjetër për shkelje të ndryshme.

Janë pezulluar 49 leje drejtimi, nga të cilat: 30 për shpejtësi tej normave të lejuara, 8 për pije alkoolike, e 11 për shkelje të tjera.

Policia Rrugore gjatë një njoftimi për mediat deklaron se ka shkelje në rregullat e qarkullimit rrugor edhe nga qytetarët, por ka paralajmëruar edhe masa ndëshkuese për ta.

“Policia Rrugore e Tiranës gjatë 24 orëve të fundit por dhe në ditët e kaluara ka konstatuar se dhe nga qytetarët ka shkelje të shumta të rregullave të qarkullimit rrugor, ku qytetarët nuk respektojnë vijat e bardha, mbikalimet në ato vende ku ka, nuk respektojnë semaforin, apo nuk kontrollojnë rrugën për të kaluar nga një krah në krahun tjetër në ato vende ku mungon semafori. Policia Rrugore në ditët në vijim do të ndërmarrë masa ndëshkuese ndaj qytetarëve që nuk respektojnë rregullat e qarkullimit rrugor. Sikundër do të intensifikojmë akoma më shumë masat në drejtim të parandalimit dhe ndëshkimit të atyre drejtueseve të automjeteve që nuk respektojnë të drejtën e këmbësorëve në vijat e bardha, apo ku mungojnë vijat e bardha dhe semaforët nuk i japin përparësi kalimit të këmbësorëve”, thuhet në njoftimin e Policisë Rrugore.

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.