Shkelje në karburante e instalime elektrike – ISHTI gjobit 46 subjekte në 6 muaj, vlera totale e masave administrative 13.11 mln lekë
45 subjekte të tregtimit me shumicë dhe pakicë të karburanteve dhe të lëndëve djegëse, pajisjeve nën presion dhe instalimeve elektrike janë gjobitur nga Inspektorati Shtetëror Teknik dhe Industrale përgjatë periudhës janar-qershor, teksa vlera totale e masave administrative arrin 13.11 mln lekë.
Ushtrimi i aktivitetit pa projekt teknik, shkelje e rregullores së shfrytëzimit teknik apo mos zbatim i kërkesave teknike në instalimin dhe kontrollin e dispozitivit diferencial, vendosur ne pajisjet, impiantet dhe instalimet elektrike, janë disa prej shkeljeve të konstatuara nga ky dikaster. Ndërkohë që, shumë prej subjekteve janë penalizuar, pasi nuk kanë plotësuar në kohë detyrat e lëna nga inspektorët, ndonëse aksidentet që shpesh herë janë shoqëruar me humbje jetësh, nuk kanë munguar.
Ndërkaq, pjesë e penalizimeve me gjobë janë edhe subjektet që tregtojnë karburant jashtë normave të lejuara, pasi konstatohet se ka shmangie në parametrat cilësore për produktin Gaz i lëngshëm, për përdorim për qëllim rezidencial. Gjithashtu, me gjobë është penalizuar edhe një subjekt, që tregton karburant jashtë normave të lejuara pasi konstatohet se ka shmangie në parametrat cilësorë për produktin gazoil, konkretisht për treguesin “squfur”. Pjesë e penalizimeve janë edhe punonjës të institucioneve shtetërore, sikurse është Operatori i Sistemit të Transmetimit apo Operatori i Shpërndarjes së Energjisë Elektrike. Ndërkaq, në raport me vitet e kaluar numri i subjekteve të penalizuar me gjobë është më i ulët.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.