Shkëmbi i Kavajës drejt rehabilitimit – FSHZH hap tenderin e punimeve me fond 372 milionë lekë
Fondi Shqiptar i Zhvillimit ka nisur procedurat e prokurimit për tenderin e rikonstruksionit të rrugëve të brendshme dhe rikualifikimit të hapësirave publikë në zonën e plazhit tek Shkëmbi i Kavajës. Fondi limit i caktuar për këtë punë është prej 372.5 milionë lekësh, ndërkohë që punimet pritet të zgjasin rreth 10 muaj, në kohë për sezonin e ardhshëm turistik.
Zona e cila ka një frekuentim të madh nga turistët gjatë stinës së verës, por edhe nga banorët e shumtë, aktualisht ka një rrjet rrugor, ku në pjesën më të madhe janë të pashtruara me asfalt dhe mungojnë trotuarët.
Gjithashtu ka një mungesë të hapësirave të rekreacionit, ndërsa hapësirat publike janë të papërshtatshme për t’u përdorur nga banorët apo turistët.
Kështu, krahas asfaltimit dhe plotësimit dhe sinjalistikë rrugore dhe ndriçim, projekti do të fokusohet edhe në shtimin e hapësirave të gjelbra, parqeve dhe këndeve të lojërave.
Tematika e projektit janë katër stinët e vitit, me qëllim që zona të jetë funksionale gjatë gjithë vitit. Shëtitorja përgjatë plazhit do të jetë një shembull i kësaj tematike, sepse është trajtuar si një udhëtim nëpër katër stinët e vitit, një shëtitje e cila në çdo ndryshim stine ka një shesh.
Ndërhyrjet në prona private pritet të jenë minimale, ndërkohë që punimet do të përfshijnë edhe rrjetin e tubacioneve dhe kanalizimeve.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.