Shkëputur nga Instagrami: Kush është Huda Kattan, kompania e së cilës vlen mbi 1 miliard dollarë?
A është shekulli XXI, shekulli i mundësive të arta, për ata që teknologjinë dhe rrjetet sociale i përdorin në dobinë e vet? Sa mund të vlejë një profil në Instagram, ose më saktë, sa i aftë mund të jetë dikush, për të shndërruar faqen e vet në një biznes ‘sundues’ të rrjeteve sociale dhe jo vetëm?
Diferenca e përdoruesve të internetit është se një pjesë e tyre ‘shfrytëzohen’ nga rrjetet sociale, ndërsa ka të tjerë që ‘i shfrytëzojnë’ këto të fundit, deri në pasuri marramendëse.
Një llogari në Instagram, mund të mbledhë aq shumë njerëz, sa në jetën reale, ndoshta nuk do të shihnim kurrë. HudaBeauty, faqja e një 35 vjeçareje irakiano – amerikane, aktualisht ndiqet nga 37.9 milionë profile, duke krijuar një perandori bukurie.
Sa vlerësohet biznesi i Huda Kattan? Sot vlen më shumë se 1 miliard dollarë, sipas prestigjiozes Forbes.
Në 2017, Huda Kattan është rankuar e para në listën e Influencerave më të pasur në botë. Për vetëm një postim të sponsorizuar, blogerja, influencerja, protagonistja e spektaklit televiziv ‘Huda Boss’, fiton 18 mijë dollarë.
Pas 7 vitesh nga krijimi i blogut të saj, ‘Time Magazine’ e ka vlerësuar si 1 nga 25 influencueset më të mëdha të internetit.
Duke u kthyer në retrospektivë, e gjithë kjo nisi me një profil në ‘Wordpress’ të biznesmenes, në vitin 2010. Huda Kattan është shembulli i influencerave modern, i atyre që bëjnë pjesë tek ‘shfrytëzuesit’ e teknologjisë, e jo tek ata që ‘shfrytëzohen’ nga teknologjia.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.