Shkollat me PPP, Bashkia hap tenderin e tretë me vlerë 1.6 mld lekë – Ja ku do të ndërtohen godinat e reja arsimore

Këtë të premte Bashkia e Tiranës ka çelur tenderin e tretë për ndërtimin e shkollave të reja në Tiranë. Godinat e reja arsimore në Zonën Tirana 3, e cila përkon me njësitë administrative nr.2 dhe nr.5, do t’i kushtojnë buxhetit të kryeqytetit dhe atij të Ministrisë së Arsimit 1.6 miliardë lekë.

Kjo shumë i bashkangjitet atyre për ndërtimin e shkollave edhe në Zonën Tirana 1 dhe Tirana 2, me vlera përkatësisht 1.94 mld lekë dhe 1.57 miliardë lekë, për një shumë totale deri tani prej 5.13 miliardë lekësh.

Në shifrën e mësipërme nuk llogaritet vlera e tenderit për Zonën Tirana 4, procedurat e të cilit pritet të nisin më 24 Nëntor.

Edhe për kontratën e njësive 2 dhe 5, do të aplikohet forma e koncesionit partneritet publik privat, ose PPP, ku operatori fitues do të përballojë me të ardhurat e veta të gjithë investimin për projektimin, ndërtimin, mobilimin, pajisjen me laboratorë, mirëmbajtjen, mbikëqyrjen dhe kolaudimin si dhe vënien në funksion të katër objekteve mësimore.

Vetëm pas përfundimit të ndërtimit të godinave dhe kur ato të jenë në operim, Bashkia do t’i paguajë kompanisë fituese një shumë të caktuar vjetore, deri në përfundimin e plotë të shumës së investuar brenda afateve të kontratës, 7 vite e 18 muaj.

Kjo do të thotë se për 7 vite, kompania fituese do të jetë administratore e këtyre shkollave e gjimnazeve publike.

Për Zonën Tirana 3, objektet e reja mësimore janë si më poshtë:

• Shkollë 9-vjeçare pranë rrethrrotullimit të Saukut, kapaciteti 30 klasa, 900 nxënës
• Shkollë 9-vjeçare pranë Liqenit Artificial në rrugën Hasan Alla, kapaciteti 30 klasa, 900 nxënës
• Shkollë 9-vjeçare në NjA Farkë, kapaciteti 24 klasa, 480 nxënës
• Shkollë e mesme pranë rrethrrotullimit të Saukut, kapaciteti 21 klasa, 630 nxënës

Më poshtë mund të shihni në hartë se ku do të ndërtohen këto godina arsimore, por edhe ato të Zonave Tirana 1 dhe Tirana 2. Këto projekte bëjnë pjesë e projektit “1 miliard dollarë” të qeverisë shqiptare për zhvillimin e infrastrukturës në Shqipëri brenda viteve të ardhshme, ndërsa financimi do të vijë nga buxhetet e 10 viteve në vijim.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.