Shkollat si qendra komunitare – Tirana, qyteti i parë që nis zbatimin e projektit
Ambientet sportive në shkolla do të kthehen në pika argëtimi gjatë pasditeve dhe fundjavave. Projekti i shkollave si qendra komunitare ka nisur të zbatohet fillimisht në kryeqytet, ku të rinjtë do të mund të shfrytëzojnë mjediset sportive të shkollave 9-vjeçare dhe të mesme.
Ndeshjes së basketbollit mes të rinjve në palestrën e Shkollës së Kuqe iu bashkua edhe kryebashkiaku, Erion Veliaj. Ky i fundit u bëri thirrje të gjithë nxënësve që të merren me aktivitete sportive, ndërsa kërkoi bashkëpunimin e prindërve që të ndihmojnë në masivizimin e sportit tek moshat e reja dhe largimin e tyre nga jeta pasive.
“Për të gjithë prindërit që ende nuk e kanë marrë vesh që bashkia ka hapur 62 palestra në gjithë qytetin, ju bëj një ftesë publike: Ngrijini fëmijët nga kolltuku, nga kafenetë, dhe regjistrojini në kurse sportive, në këto 62 hapësira, sepse është investimi më i mirë që një prind mund të bëjë për fëmijën e vet”, tha Veliaj.
Përmes kësaj nisme, Bashkia e Tiranës synon jo vetëm të nxisë të rinjtë që të angazhohen në ushtrimin e sporteve të ndryshme, por edhe të evidentojë fëmijët që kanë talente në sporte specifike.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.