Shkrirja e Ndërmarrjes së Prodhimit të Çeliqeve, Elbasan – 577 mijë euro në ankand për mallrat në pronësi
Qeveria shqiptare vazhdon procedurat e shitjes në ankand të aseteve të ndërmarrjeve të vjetra të komunizmit. Javën e ardhshme, më 16 Shkurt, radhën e ka ankandi publik i mallrave të Ndërmarrjes së Prodhimit të Çeliqeve Elbasan.
Mallrat e mbetura si tulla apo materiale të tjera do t’i nënshtrohen procedurës së hapur të ankandit, për një vlerë totale prej 76.9 milionë lekësh. Ato do të ndahen në 13 lote, pra në 13 grupe për të cilat do të ofertohet në mënyrë të veçantë.
Pavarësisht vlerës së lartë, pritet që interesi për këto mallra të jetë i zbehtë, duke u bazuar në inventar. Kështu, në listë për t’u shitur janë pjesë të ndryshme këmbimi për lokomotiva, makineri, pajisje hidraulike, elektromotorrë, etj.
Ankandi do të zhvillohet në zyrat e Ndërmarrjes së Prodhimit të Çeliqeve në ish-Kombinatin Metalurgjik të Elbasanit.
Ndërkohë, shteti po has vështirësi në shitjen e objekteve dhe pronave të ndryshme, si pasuritë e ish-firmave piramidale, të cilat do të dalin sërish në ankand më datë 27 Shkurt. Vlera e përgjithshme e këtyre pasurive kap shifrën e 142.6 milionë lekëve.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.