Shkurtimet e pensioneve dhe rritja e taksave në Greqi – Tsipras: Tani janë të panevojshme
“Shkurtimet e planifikuara të pensioneve të Greqisë dhe rritja e taksave nuk janë më të nevojshme pasi kombi ka arritur objektivat e tij të buxhetit.” Deklarata ka ardhur nga kryeministri grek, Alexis Tsipras gjatë fjalimit të tij mbi politikat ekonomike të pas-shpëtimit.
Sipas tij, masat për lehtësimin e borxheve ‘janë me e pakta që mund të bëjmë për një popull që ka kaluar momente të vështira’, duke shprehur bindjen se populli nuk do të kthehet përsëri te programet e shpëtimit.’
Megjithatë, ulja e pensioneve është miratuar me ligj dhe është parashikuar të hyjë në fuqi në janar të vitit të ardhshëm.
Ndërsa njoftoi se nuk do të ketë rritje të taksave gjatë viteve të ardhshme, Tsipras tha se ka në plan të rrisë shpenzimet për programet e punësimit dhe mirëqenies, që sipas tij nuk do të rrezikonin objektivat fiskale të vendosura nga kreditorët e Greqisë.
Ndërkohë, më herët ishte planifikuar që një rritje e mundshme e taksave të ndodhte deri në vitin 2020.
Tsipras po kërkon rizgjedhje vitin e ardhshëm, edhe pse sondazhet tregojnë për rezultate jo në favor të tij. Përmes këtyre dy masave, kryeministri aktual grek po përpiqet ‘të kënaqë’ popullin e pakënaqur duke siguruar tregjet dhe kreditorët europianë që Greqia të largohet nga programi i detyruar i kursimit, i miratuar tetë vjet më parë në këmbim të ndihmës.
Me sa duket planet e pas-shpëtimit të Tsipras do të varen nga miratimi i Komisionit Europian sapo të marrë projeksionet ekonomike të Greqisë në mes të tetorit. Sipas Tsipras zyrtarët presin që Greqia të “tejkalojë nivelin” e suficitit buxhetor prej 3.5% për vitin 2019, i cili më pas do t’i japë Athinës mundësinë për të penguar tatimet e ardhshme dhe rritjen e pensioneve.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.