Shoqata e industrialistëve italianë propozon plan masash ekonomike për të përballuar krizën ndaj koronavirusit

Confindustria Albania, e cila është shoqata përfaqësuese e industrialistëve italianë në Shqipëri ka bërë një listë propozimesh ndaj qeverisë shqiptare për të përballuar sipas tyre krizën emergjente të shkaktuar nga pandemia globale lidhur me sistemin e prodhimit.

Sipas, kësaj shoqate, kompanitë kanë pësuar rënie të thkesuara në xhirot e tyre, prandaj qeveria shqiptare duhet të reagojë në mënyrë që të ruhet vazhdimësia e prodhimit dhe të garantohen flukset e furnizimit dhe shpërndarjes.

Masat e paraqitura do të synojnë përballimin e krizës ekonomike dhe sociale sipas Confidustrisë Albania.

Masat paraqiten si më poshtë:

– të garantohet menjëherë likuiditeti i kompanive, të prekura nga urgjenca epidemiologjike, përmes pezullimit të taksave dhe pagesave të kontributeve;

– të sigurohet procedurë homogjene në të gjithë territorin kombëtar për të garantuar vazhdimësinë produktive, duke shmangur ndërhyrjet e fragmentuara dhe kontradiktore midis niveleve të ndryshme të qeverisjes;

– të parashikohet që punonjësit që qëndrojnë në shtëpi për shkak të ndërprerjes së veprimtarive, si dhe ata që vetë karantinohen, të trajtohen si të sëmurë dhe të paguhen nga fondi i sigurimeve shoqërore dhe shëndetësore për një periudhë të paktën një mujore;

– të parashikohet shtyrja e afatit të paraqitjes së pasqyrave financiare për vitin 2019 pranë zyrave së tatim –taksave,

 – të shmanget bllokimi i llogarive bankare të kompanisë për shkak të detyrimeve tatimore për kohëzgjatjen e situatës virale,

 – të shmanget ndërprerja e shërbimeve themelore (të tilla si, energjia elektrike, uji) për arsye të mospagimit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.