Shoqatat e Bashkëpunimit Bujqësor – Ahmetaj: Njësitë e para që do të marrin mbështetjen e drejtpërdrejtë
‘Mbështetja për bujqësinë për vitin 2018 është më e larta në 27 vite.’ Deklarata ka ardhur nga ministri i Financave dhe Ekonomisë, Arben Ahmetaj, gjatë takimit në njësitë Grabian dhe Gradishtë, Bashkia Divjakë, në kuadër të turit të llogaridhënies publike.
Sipas tij, së bashku me kontributin e buxhetit të shtetit si dhe programit IPARD, mbështetja për bujqësinë arrin vlerën e 93 milionë lekëve.
“Mbështetja për bujqësinë sivjet në 2018 është realisht më e larta në 27 vite. Janë 26 milionë dollarë, pra afërsisht 22 milionë euro vetëm nga buxheti i shtetit për mbështetjen tuaj. Ndërkohë, fillon shumë shpejt projekti i Komisionit Europian IPARD dhe kjo është zona që është më shumë e prirur për të përfituar, qoftë si fermerë por qoftë dhe si bashkime bujqësore. E gjithë shuma, së bashku me kontributin e buxhetit të shtetit, shkon në 93 milionë euro”, tha Ahmetaj.
Duke u ndalur veçanërisht tek qarku i Fierit, ministri tha se për këtë të fundit deri tani për këtë vit janë aprovuar 428 milionë euro nga mbështetja e buxhetit të shteitt. Ndërkohë, më tej ka vënë theksin te Shoqatat e Bashkëpunimit Bujqësor, që sipas tij do të jenë njësitë e para që do të marrin mbështetje.
“E para, do të trajtohen si fermer i madh pa limit që do të thotë që të përfitojnë rimbursim TVSH-je pa qenë nevoja të deklarojnë, dhe e dyta, në politikën që ne kemi për mbështetjen e bujqësisë, këto do të jenë njësitë e para që do të marrin mbështetjen e drejtpërdrejtë”, tha Ahmetaj.
Ndërkohë, në takim morën pjesë edhe deputeti i zonës dhe njëkohësisht Kryetari i Komisionit Parlamentar për Ekonominë, Erion Braçe. Ky i fundit evidentoi edhe disa shqetësime kryesisht lidhur me skemën e rimbursimit të fermerëve si dhe pronësinë e tokave bujqësore, për të cilat shtoi se kanë iniciuar ndryshimet ligjore përkatëse.
“Është një çështje burokratike, do duhej që Ministria e Bujqësisë ta bënte vetë këtë gjë. Ne duhet t’u japim tokën bujqve sipas vendimeve në fuqi. Kemi bërë gati edhe ndryshimet ligjore që duhen, qoftë në ligjin 7501, qoftë në ligjin për trajtimin e ndërmarrjeve bujqësore, qoftë në VKM respektive, në mënyrë që këtyre njerëzve t’u japim një zgjidhje përfundimtare”, u shpreh Brace.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.