Shoqëritë e Bashkëpunimit Bujqësor – Rrapaj: Të ndryshohet ligji, tatimet i trajtojnë si SHPK
Ligji për Shoqëritë e Bashkëpunimit Bujqësor duhet të ndryshohet, pasi aktualisht ai po keqinterpretohet nga drejtoritë e tatimeve duke i trajtuar këto bashkime si SHPK”. Kërkesa vjen nga kryetari i Këshillit të Agrobiznesit Shqiptar, Agim Rrapaj, i cili ishte i ftuar në studion e TV SCAN për të folur mbi bujqësinë sociale, që përfshin 90% të fermerëve në vend.
“Kemi ligjin 38/2012 për ‘Shoqëritë e Bashkëpunimit Bujqësor.’ Ky është një gjysmë ligji dhe ky ligj i trajton Shoqëritë e Bashkëpunimit Bujqësor si identitete jofitimprurëse, si njësi jofitimprurëse, por realisht trajtohen. Më mbrapa ka një shtesë tjetër në ligj ku thuhet që këto Shoqëri mund të trajtohen edhe me ligjin e Shoqërive me Përgjegjësi të Kufizuar. Atëherë, kjo kakofoni, kjo përplasje bën që tatimet, iu intereson që t’i trajtojnë me ligjin për ‘Shoqëritë me Përgjegjësi të Kufizuar.’ Kjo nuk kishte nevojë për arsye sepse ai është më mirë i paformalizuar, se sat ë krijojë një SHPK, se s’ka interes të krijojë SHPK. Ai do një SHBB që të mbështetet, ai kërkon një SHBB që të përfitojë shitjen e produktit me TVSH. Ai do një SHBB që të përfitojë subvencione. Ai do një SHBB që të marrë kredi. Ai do një SHBB që t’i jepet asistencë drejtuesve të SHBB.”
Sipas Rrapaj, zgjidhja për disbursimin e fondeve të skemave mbështetëse është pikërisht ngritja e Shoqërive të Bashkëpunimit Bujqësor.
“Ne kemi 3000 fshatra, nga të cilët 2500 janë aktivë në prodhim dhe në qoftë se ne bëjmë 2500 SHBB minimum, atëherë ne kemi mundësin edhe kemi hedhur bazën për të realizuar disbursimin e fondeve përmes SHBB-ve. Në qoftë se do të behet ajo që ministri ka premtuar, që do te ketë një skemë edhe te AZHBR për mbështetjen e SHBB-ve, skemë subvencioni që është kryesorja, atëherë ne kemi dritën jeshile dhe mundësinë për të filluar me trajnimin e stafeve të SHBB-së, për të kuptuar ç ‘janë skemat, ç ‘është IPARD-i, çfarë janë donacionet e ndryshme, për të kuptuar legjislacionin e me radhë. Dhe këtu ne themi që në këtë lloj forme ne zgjidhim problemin që ka bujqësia sociale dhe agrobiznesi, kjo fashë e pa integruar dhe paformalizuar që zë 90 për qind të të gjithë prodhimit.”
Aktualisht numërohen 64 Shoqëri të Bashkëpunimit Bujqësor.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.