Shpallet fituesi i zgjedhjeve për rektor në Universitetin e Tiranës / Kush është Artan Hoxha
Ditën e sotshme janë mbajtur zgjedhjet për postin kryesor të Universitetit të Tiranës, atë të rektorit. Sipas rezultatit të shpallur, Artan Hoxha është zgjedhur Rektor i Universitetit të Tiranës, pasi ka arritur të sigurojë 54% të votave të pedagogëve dhe studentëve.
Dy kandidatët e tjerë për postin drejtues të UT ishin Mimoza Hafizit, e cila ka marrë 176 vota, dhe Kozeta Sevranit, që ka siguruar 122 vota.
Z.Hoxha ka një karrierë të gjatë në funksionin e pedagogut dhe që nga viti 2016 ka mbajtur postin e Dekanit të Fakultetit të Drejtësisë në Universitetin e Tiranës. Më parë, ai ka qenë edhe pjesë e organeve të drejtësisë duke mbajtur poste të rëndësishme, si prokuror në qytetin e Lushnjes dhe Gjyqtar i Gjykatës së Lartë në vitin 2008.
Prof. Dr. Artan Hoxha ka përfunduar studimet e larta për drejtësi në Universitetin e Tiranës, në vitin 1983 dhe ato pasuniversitare për Konventat e Këshillit të Evropës në fushën penale në Fakultetin e Drejtësisë të Universitetit të Leidenit, Hollandë, në vitin 1995.
Gjatë karrierës së tij profesionale, Z. Hoxha ka qenë anëtar i disa grupeve të punës dhe komiteteve për zhvillimin e legjislacionit në Shqipëri, si anëtar i grupit të punës për hartimin e Kodit të Procedurës Penale (1992 – 1994), anëtar i Komisionit të Reformave Ligjore dhe Institucionale të ngritur pranë Ministrisë së Drejtësisë (2004 – 2006), dhe Kryetar i Komisionit për Ndihmë Legjislative të Konferencës Gjyqësore Kombëtare.
Gjithashtu, që prej vitit 2018 Z.Hoxha është anëtar i Këshillit Mbikëqyrës të Bankës së Shqipërisë.
D.B – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.