Shpallet tenderi/ 200 milionë lekë për rrjetin e ujësjellësit në Durrës
200 milionë lekë për rikonstruksionin e rrjetit ekzistues të ujësjellësit në Durrës. Tenderi është shpallur në Agjencinë e Prokurimit Publik dhe bëhet fjalë për zonën 14 të qytetit.
Objektivat e tenderit konsistojnë në furnizimin e zonës së Durrësit, Kënetës dhe zonës Arapaj, përmirësimin e orarit të furnizimit me ujë, përmirësimin e sasisë së ujit për frymë, apo përmirësimin e cilësisë së ujit.
Sipas specifikimeve teknike, projekti konsiston në rikonstruksionin e depove ekzistuese të ujit, si dhe të linjave kryesore të tubacioneve shpërndarëse.
“Zona e projektit përfshin të gjithë qytetin e Durrësit, Kënetën dhe Arapaj. Në zonën e qytetit kemi zhvillim të ndërtesave të larta deri 12-kate në zonat e vjetra me shtëpi të ulëta 2 kate duke rritur konsumin e ujit dyfish, pasi numri i apartamenteve të një pallati 12-katesh (rreth 40-50 apartamente) krahasohet me lagje të vogla të qytetit. Gjithashtu në qytet është zhvilluar shumë sektori i hotelerisë dhe shërbimeve të cilat punojnë në sezonin e verës me kapacitet të plotë duke ndikuar në rritjen e numrit të popullsisë rezidente dhe për pasojë, rritjen e konsumit në orë piku pas plazhit (drekë dhe darkë) duke ulur sasinë e ujit për frymë ose skenari më i keq duke u furnizuar me orare për shkak të kapacitetit të vogël të depove ekzistuese” specifikohet në detajet e tenderit.
Ndër të tjera, ndërhyrjet e paligjshme në rrjet kanë sjellë rritje të konsumit të ujit, si dhe defekte dhe rrjedhje të ujit.
Sipas dokumentacionit të tenderit, afati kohor për ekzekutimin e projektit është 13 muaj, që nga nënshkrimi i kontratës me subjektin fitues.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.