Shpallet tenderi/ Tirana nuk do të “vuajë” për ujë në 25 vitet e ardhshme! “Unaza e presionit” që do të furnizojë kryeqytetin 24 në 24

Ujësjellës Kanalizimet Tiranë kanë shpallur tenderin me fond 67.8 milionë lekë në Agjencinë e Prokurimit Publik. Bëhet fjalë për një investim me perspektivë 25 vjeçare për qytetin e Tiranës.

Sipas detajeve të tenderit, kryeqytetasit nuk do të “vuajnë” më për ujë, pasi do të ketë furnizim 24 orë në 24. Projektimi vjen mbështetur në studimin e masterplanit të zhvillimit teknik nga Budapest WaterWorks dhe Lorenco & Co.

“Problem mbetet për zonat furnizimi me ujë 24 orë, gjë që sot bëhet nëpërmjet sistemit të depozitave të vendosura në tarracat e godinave të ndërtuara para viteve ’90 tokësore dhe depozitave nëntokësore nëpërmjet një sistemi me pompa te investuar nga vetë qytetarët. Rrjeti Shpërndarës fillon nga depot dhe përfundon te  konsumatori. Rrjeti shpërndarës i Ujësjellësit të Tiranës është dy llojesh: Rrjet i Hapur  dhe Rrjet Unazor.  Në përgjithësi në Tiranë dominon rrjeti i hapur, ndërsa rrjeti unazor ndeshet vetëm në zona të vogla. Në përgjithësi rrjeti i hapur është një rrjet që sjell probleme në kushtet e pikut për kërkesë për ujë” specifikohet në tender.

Rrjeti Unazor për furnizim me ujë 24 orë pritet të bëhet nëpërmjet përfundimit të fazës së dytë të Ujësjellësit me vetë rrjedhje të burimeve të Shën Mërisë, ndërtimin e dyfishimit të kapacitetit të Bovillës dhe me ndërtim të Ujësjellësit të Gurit të Bardhë.

Aktualisht, Tirana furnizohet nga 3 lloje burimesh ujore; burimet sipërfaqësore, nëntokësore, me ngritje mekanike dhe me burime me vetërrjedhje. Përpos kësaj, edhe nga stacionet e pompimit nga ujërat nëntokësore. Projekti është i ndarë në lote dhe ka një afat kohor për ekzekutim 6 muaj, që nga nënshkrimi i kontratës me subjektin fitues.

Aktualisht, po kryhet një “aksion” depozitash në Tiranë, duke qenë se qytetarët do të duhet të gjejnë zgjidhje alternative, në rastet kur pallatet nuk janë mjaftueshëm të fortë për të përballuar peshën.

Rikujtojmë se një nga problematikat e hasura nga inxhinierët shqiptarë dhe të huaj në terren nga kontrollet “post- tërmet” ishte pikërisht vendosja e depozitave të ujit në tarracat e pallateve, duke sjellë jo vetëm amortizimin e këtyre objekteve, por edhe rrezikuar jetën e qytetarëve.

Jenida Vladi/ SCAN

Lexo edhe: 

Vendimi/Si do të hiqen depozitat e ujit nga pallatet në Tiranë! Detajet, kur do të lejohen dhe ku do të vendosen

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.