Shpallin likuidimin 23 biznese – Administratorët ftojnë kreditorët të paraqesin pretendimet
Viti 2017 ka shënuar një numër të lartë mbylljesh apo prishjesh të bizneseve. Sipas të dhënave zyrtare të Qendrës Kombëtare të Biznesit, nga janari kanë shpallur procedurat e likuidimit 23 subjekte.
Mes tyre bien në sy subjekte të rëndësishme si Kombinati Energjitik i Elbasanit, apo kompani me peshë në sektorin e energjisë.
Nuk mungojnë as kompanitë Call Center, të cilat nga fundi i vitit të shkuar gjenden në pozitë të vështirë për shkak të ashpërsimit të legjislacionit italian për këtë sektor.
Secilës prej shoqërive i është caktuar një administrator për të mbikëqyrur procedurat e likuidimit, me qëllim shqyrtimin e çdo pretendimi të mundshëm nga ana e kreditorëve.
Ndërkaq shumë më i lartë është numri i bizneseve që kanë zgjedhur të mos mbyllen, por të pezullojnë aktivitetin.
Në harkun kohor të një viti, lista e bizneseve që kanë pezulluar aktivitetin është shtuar me rreth 17 mijë subjekte të reja. Sipas të dhënave zyrtare të Drejtorisë së Përgjithshme të Tatimeve, në prill të këtij viti lista me bizneset që kanë shpallur statusin pasiv numëron 108 mijë subjekte, ndërkohë që në të njëjtën periudhë të një viti më parë, numri i tyre arrinte në 91 mijë.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.