Shpend Ahmeti deklaron se do të rikandidojë për një mandat të dytë në Prishtinë
Kryetari i Bashkisë së Prishtinës Shpend Ahmeti ka bërë të ditur se do të rikandidojë në zgjedhjet e ardhshme. I ftuar në emisionin “Rrokum Roll” të gazetarit Fidan Jupolli, Ahmeti tha se nevoja për të vazhduar projektin e Prishtinës nënkupton marrjen e një tjetër mandati në krye të Bashkisë.
“Është një projekt që e kemi nisur. Kemi arritur të ndalim të keqen, kemi vendosur një drejtësi sociale në qytet, ndërsa tani vjen periudha e zhvillimit”.
Sipas Ahmetit, në 4 vitet e ardhshme, do të tregohet zhvillimi i vërtetë që ka marrë qyteti dhe se Prishtina do të vijojë ndryshimin.
Më pas Kryetari i Bashkisë numëroi arritjet kryesore, si ndalimi i ndërtimeve pa leje, përmirësimi i transportit publik si dhe zhvillimin e infrastrukturës publike në arsim dhe shëndetësi.
Ahmeti dhe “Vetëvendosje” do të përpiqen të fitojnë edhe mazhorancën në asamblenë komunale, për të evituar përsëritjen e bllokimeve në zhvillimin e Prishtinës.
“Nëse unë kandidoj, dhe duket se do të kandidoj, do të kërkoj nga qytetarët e Prishtinës votën në Kuvendin Komunal. Mos të ndodhë se herën e kaluar, ku vota për kryetar shkoi për Shpendin, ndërsa nga ana tjetër po ia jap votën një partie tjetër”, u shpreh Ahmeti.
Me arritjen e një shumice në Kuvendin Komunal, Shpend Ahmeti mendon se puna do të jetë edhe më e madhe dhe më e dukshme.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.