Shpenzimet në shëndetësi – Kujdesit parësor i hiqen 300 mln lekë, kalojnë për kujdesin dytësor

Rreth 300 milionë lekë më pak do të jetë buxheti për kujdesin parësor në vitin 2018. Me vendimin më të fundit të Këshillit të Ministrave fondi për kujdesin parësor do të pakësohet me 300 milionë lekë, ndërkohë që kjo vlerë financiare do të shkojë për kujdesin dytësor.

Vendimi është marrë nga Këshilli i Ministrave pas kërkesës që është bërë nga Ministria e Shëndetësisë dhe e Mbrojtjes Sociale për rishpërndarjen e fondeve. Nëse i referohemi buxhetit fillestar për vitin 2018, fondi që i vënë në dispozicion për kujdesin parësor ishte 9.4 miliardë lekë.

Ndërsa fondi për kujdesin shëndetësor dytësor ishte në vlerën e 22.9 miliardë lekë. Një tjetër vendim i marrë nga Këshilli i Ministrave ka të bëjë me organizimin dhe funksionimi e Agjencisë së Falimentit.

Sipas këtij vendimi bëhet kthimi i Agjencisë në institucionin e vetëm publik informues për çështjet e falimentimit në Shqipëri.

Agjencia ka të drejtë të mbikëqyrë dhe të kontrollojë, periodikisht, në çdo kohë, subjektet e licencuara prej saj, si dhe të kërkojë të verifikojë çdo informacion, të cilin e konsideron të nevojshëm për ushtrimin e funksioneve të ngarkuara me ligj.

Agjencia mban dhe përditëson në formë shkresore dhe elektronike, regjistrin e administratorëve të certifikuar të falimentimit. Ndërkohë që për realizimin e detyrave, Agjencia ka buxhetin e saj, si zë i veçantë në buxhetin e Ministrisë së Drejtësisë.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.