Shpenzimet për humbjet e energjisë në rrjet – OST planifikon të shpenzojë 10 mln euro për humbjet në transmetim

Rreth 10 mln euro parashikohet të shpenzohet nga Operatori i Sistemit të Transmetimit për të mbuluar humbjet e energjisë në rrjet.  Sipas këtij dikasteri, për vitin 2021, humbjet e energjisë në rrjetin e transmetimit vlerësohen të jenë rreth 184 milionë kwh, ndërkohë që sipas procedurave që janë në fuqi kjo energji prokurohet përmes proceduarve konkurruese. Përllogaritja e shumës së nevojshme është bërë me një çmim mesatar prej 55 euro/Mwh.

Ndërkohë që, sipas të dhënave të Instituti të Statistikave në vend humbjet në rrjetin e transmetimit u rritën  rritën me 2,1% gjatë vitit 2020, në raport me një vit më parë. Pesha që humbjet në transmetim zënë në totalin e humbjeve në rrjet është 10,6%, ndërkohë që humbjet  në  shpërndarje zënë  një  peshë  më  të madhe, me  rreth  89,4%.

Humbjet në rrjetin e transmetimit kërkojnë investime për të ulur nivelin e tyre, ndërkohë që sipas OST-së, janë disa projekte që aktualisht po financohen përmes kredive, sikurse është  ndërtimi i linjës së interkonjeksionit 400 kV Shqipëri-Maqedoni,   -Bitola dhe Elbasan 2- Fier, ndërhyrje në disa nënstacione, si dhe projekti për eficencën e energjisë në sektorin e transmetimit.

Ndërkohë që, përveç tyre, OST ka planifikuar per vitin 2021 investime me fondet e veta, për rehabilitimin dhe fuqizimin e linjës 110 kV Librazhd-Përrenjas, Rikonstruksionin e linjave 110 kV Cërrik – Kajan – Kuçovë – Jagodine, ndërtimi i linjës së re me dy qarqe, 30 km Burrel-Bulqizë, etj.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.