Shpenzimet për paga – Në rritje për tremujorin IV 2017
Bizneset rritën shpenzimet për paga në tremujorin e fundit të vitit 2017. Sipas Institutit të Statistikave, përgjithësisht rritja e fondit të pagave është më e lartë se rritja e numrit të punonjësve, çka nënkupton një rritje të pagës mesatare në shumicën e degëve të ekonomisë. Rritjen më të lartë të fondit të pagave e raportuan sektori i energjisë, ndërtimi dhe industria përpunuese.
Në energjetikë, fondi i pagave u zgjerua me afro 19%, rritje kjo disa herë më e lartë në raport me rritjen e numrit të të punësuarve. Në ndërtim, indeksi i fondit të pagave u zgjerua me 13.7%, duke iu bashkangjitur treguesve të tjerë që dëshmojnë një ecuri pozitive të sektorit gjatë vitit 2017.
Ndërkohë që industria nxjerrëse regjistroi një frenim në shumicën e treguesve, në tremujorin e katërt pati një përmirësim të ndjeshëm në segmentin e industrisë përpunuese. Indeksi i fondit të pagave në tremujorin e fundit u rrit me 8.3%, rritja më e lartë e regjistruar për vitin 2017.
Për sa i takon shërbimeve, një ecuri të dobët pati në sektorin me peshën kryesore, atë të tregtisë, ku indeksi i fondit të pagave ra me 0.2%. Sidoqoftë, kjo rënie ishte më e kufizuar në raport me rënien prej 2.7% të numrit të të punësuarve, çka tregon se paga mesatare ka ardhur gjithsesi në rritje.
Ecurinë më të mirë edhe gjatë tremujorit të fundit të vitit e shfaqën aktivitetet e shërbimeve të lidhura me turizmin. Në hoteleri, fondi i pagave u rrit me 14.2%, ndërsa për agjencitë e udhëtimit rritja ishte 9%.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.