Shpërblimi i pensionistëve – Hado: Mund ta tërheqin duke nisur nga data 17 dhjetor
Duke filluar nga data 17 dhjetor 2018, Instituti i Sigurimeve Shoqërore në bashkëpunim me Postën Shqiptare do të nisë pagesën e shpërblimit të festave të fundvitit për pensionistët.
Lajmin e ka bërë të ditur kreu i ISHSH-së, Astrit Hado, përmes një postimi në profilin e tij në ‘Facebook’, ku ka publikuar edhe grafikun sipas të cilit do të merret edhe shpërblimi prej 5 mijë lekësh.
“Sipas këtij grafiku, të miratuar për këtë qëllim, do të punohet me orar veprimi nga ora 7.30 deri në orën 20.00, çdo ditë, duke filluar nga data 17.12.2018. Çdo ditë, deri në orën 14:00, do të realizohet pagimi i pensionit dhe shpërblimi për ata pensionistë që kanë datën e tërheqjes së pensionit dhe pas kësaj ore do të paguhet shpërblimi për pensionistët që e kanë tërhequr pensionin para kësaj date, sipas grafikut të mëposhtëm”, shkruan Hado.
Ndërkohë, shton më tej se të gjithë pensionistët që tërheqin pensionin pranë bankave të nivelit të dytë në datën 20 dhjetor do t’iu transferohet njëkohësisht edhe masa e shpërblimit. Ndërsa, për pensionistët që tërheqin pensionin në zyrat postare në fshatra, shpërblimi do të paguhet sipas datave të pagesës së pensioneve, duke nisur nga data 18 dhjetor e në vijim.
Ndërkohë, ata që nuk do të mund ta tërheqin shpërblimin deri më 29 dhjetor, sipas Hados mund ta marrin në muajin janar 2019 së bashku me pensionin.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.