Shpërndahen 24.3 milionë euro/ Paketa e dytë- Janë paguar rreth 76 mijë punonjës dhe refuzuar mbi 3 mijë!
Pothuajse 2 javë nga hapja e aplikimeve për qytetarët që përfitojnë 40 mijë lekëshin nga paketa financiare e dytë e qeverisë, deri më tani janë paguar 75,818 punonjës, me një vlerë prej 3 miliardë lekësh.
Sipas të dhënave zyrtare të Drejtorisë së Përgjithshme të Tatimeve, në total janë miratuar kërkesat për 84,826, ku në proces verifikimi janë 10,167 prej tyre ndërsa janë refuzuar 3137 punonjës të tjerë të cilët nuk plotësojnë kriteret apo nuk kanë plotësuar sicc duhet formularët. Në këtë rast, tatimpaguesit që janë refuzuar apo që nuk kanë mundur të aplikojnë mund të paraqesin formularin e ankesës pranë administratës tatimore në e-filling, ku të shprehin qartë problematikën si dhe të vendosin ID e punonjësve të cilët pretendojnë se nuk janë përfshirë në kërkesën për ndihmë financiare, të paraplotësuar me të dhënat e individëve potencialisht përfitues.
Nga paketa e dytë financiare, janë parashikuar të përfitojnë pagën prej 40 mijë lekësh, 176 mijë punonjës në total, ku 100 mijë janë pjesë e biznesit të vogël, 66 mijë në biznesin e madh dhe 10 mijë në sektorin e turizmit. Ndërsa deri më tani, duket se 100 mijë janë ende jashtë skemës. Shuma e vënë në dispozicion është 7 miliardë lekë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.