Shpërthimi në Bejrut – Presidenti i Libanit: Hetimi do të zbulojë nëse ka pasur ndërhyrje të jashtme
Presidenti i Libanit tha se hetimi për shpërthimin më të madh në historinë e Bejrutit, të martën e 4 gushtit, që shënoi mijëra të plagosur dhe mbi 150 të vdekur, do të përcaktonte nëse ishte shkaktuar nga një bombë apo ndërhyrje tjetër e jashtme.
Aoun, i cili më parë kishte thënë se materiali eksploziv ishte ruajtur në mënyrë të pasigurt për vite me rradhë në port, tha se hetimi duhet të zbulojë të vërtetën që fshihet pas këtij shpërthimi tragjik.“Shkaku nuk është përcaktuar ende. Ekziston mundësia e një ndërhyrjeje të jashtme që mund të ketë ndodhur, përmes një rakete, bombe ose ndonjë mjeti tjetër, “tha Presidenti Mishel Aoun për median lokale.
Zyrtarët kanë deklaruar se shpërthimi, ndikimi i të cilit u regjistrua qindra milje larg, mund të ketë shkaktuar një dëm prej 15 miliardë dollarësh.Kjo është një faturë që Libani nuk mund ta paguajë, pasi borxhi që ka tejkalon 150% të prodhimit të brendshëm bruto, ndërkohë që është ende në bisedime për një mbështetje të mundshme nga Fondi Monetar Ndërkombëtar.
Lidhur me shkaqet e shpërthimit, burimet paraprake raportojnë se sipas hetimeve, shkak kryesor ka qenë neglizhenca lidhur me ruajtjen pa masa sigurie të lëndëve që ndodheshin në port.
Përgjatë gjithë këtyre ditëve, forcat e shpëtimit janë futur nën rrënoja për të gjetur këdo që është akoma gjallë pas shpërthimit në port që vrau të paktën 154 persona dhe plagosi më shumë se 5000.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.