“Shpëtohet” pakti bërthamor i Iranit – Palët e mbetura bien dakord që të vazhdojnë tregtinë me vendin

Palët e mbetura në marrëveshjen bërthamore të Iranit ranë dakord që të vazhdojnë tregtinë me vendin pavarësisht sanksioneve nga Shtetet e Bashkuara.

Presidenti Donald Trump vendosi në muajin Maj që të braktisë paktin dhe të rikthejë sanksionet ekonomike ndaj Iranit, përfshirë ndalimin e blerjes së naftës nga Teherani.

Pas një takimi mes përfaqësuesve nga Britania, Kina, Franca, Gjermania, Rusia dhe Irani, u ra dakord zhvillimi i një mekanizmi të pagesave, në mënyrë që të vazhdojë tregtia me vendin.

Sipas diplomatëve propozimi synon të krijojë një sistem të këmbimit, të ngjashëm me atë të përdorur nga Bashkimi Sovjetik gjatë Luftës së Ftohtë, për të këmbyer naftë iraniane me mallra europianë, pa përdorur para.

Kjo synon që të tejkalojë sanksionet amerikane që pritet të rivendosen në Nëntor, nën të cilat Washingtoni mund të shkëpusë nga sistemi financiar amerikan çdo bankë që mundëson transaksione të naftës me Iranin.

Shefja e politikave të jashtme të Bashkimit Europian, Federica Mogherini, tha se vendimi për të krijuar një mekanizëm të tillë është marrë dhe se ekspertët teknikë do të takohen më vonë për të prezantuar detajet.

Shumë analistë janë skeptikë dhe argumentojnë se SHBA mund të amendojnë ligjin e sanksioneve për të ndaluar transaksionet e tilla. Bashkimi Europian ka dështuar deri më tani që të zbulojë një kuadër funksional ligjor që të mbrojë kompanitë nga sanksionet amerikane.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.