Shpresat për paqe në Ukrainë rrisin euron – Monedha europiane ngjitet pranë mesatares 200-ditore, prej 1.11 dollarë
Euro ka zgjeruar fitimet përballë dollarit amerikan edhe në sesionin e sotëm, duke u ngjitur në mbi 1.11 USD, për shkak të shenjave të progresit në bisedimet mes Rusisë dhe Ukrainës, të zhvilluara një ditë më parë në Turqi.
Gjithashtu, edhe jeni japonez ka fituar ndjeshëm terren në raport me dollarin, duke u rritur me mbi 1% në rreth 121 jen për dollar. Divergjenca e politikave monetare mes Rezervës Federale dhe Bankës së Japonisë ka ushtruar presion mbi jenin.
Ndërkohë, monedha europiane është ngjitur pranë nivelit mesatar 200-ditore në raport me dollarin, në mbi 1.11. Përsa i përket bisedimeve të paqes, Rusia premtoi se do të ngadalësojë operacionet ushtarake rreth Kievit, ndërsa Ukraina premtoi se do të adoptojë statusin neutral, në një shenjë progresi gjatë bisedimeve që u zhvilluan ballë për ballë në Stamboll.
Por, zyrtarët amerikanë kanë paralajmëruar se kërcënimi ndaj Kievit nuk ka përfunduar. Në tregun e kriptovalutave, bitcoin po tregtohet në mbi 47 mijë dollarë, ndërsa ethereum po tregtohet në rreth 3400 dollarë.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.