Shpronësime në Tropojë – Rreth 13.4 milion lekë për përfituesit që preken nga ndërtimi i unazës së qytetit
Nëpërmjet një njoftimi të publikuar në Fletoren Zyrtare është bërë me dije se Këshilli i Ministrave ka vendosur shpronësimin për interes publik të pronarëve të pasurive të paluajtshme, pronë private, që preken nga projekti “Ndërtimi i unazës së qytetit Bajram Curri, faza II”, Tropojë.
Shpronësimi bëhet në favor të Bashkisë Tropojë.
Pronarët e pasurive të paluajtshme, pronë private, që shpronësohen, do të kompensohen në vlerë të plotë, në shumën e përgjithshme prej 13 425 681 (trembëdhjetë milionë e katërqind e njëzet e pesë mijë e gjashtëqind e tetëdhjetë e një) lekësh, vlerë e cila do të përballohet nga buxheti i Bashkisë Tropojë.
Vlera për shpenzimet procedurale, në masën 50 000 (pesëdhjetë mijë) lekë, të përballohet nga fondet e Ministrisë së Infrastrukturës dhe Energjisë.
Shpronësimi i pronarëve të pasurive të paluajtshme, pronë private, fillon menjëherë pas botimit të këtij vendimi në Fletoren Zyrtare dhe afati i përfundimit të shpronësimit të jetë brenda 3 (tre) muajve nga data e hyrjes në fuqi të këtij vendimi.
Bashkia Tropojë kryen procedurat për likuidimin e pronarëve të shpronësuar, sipas përcaktimeve të bëra në këtë vendim.
Afati i fillimit dhe i përfundimit të punimeve të jetë në përputhje me afatet e parashikuara nga Bashkia Tropojë.
Agjencia Shtetërore e Kadastrës, Zyra Vendore Tropojë, brenda 30 (tridhjetë) ditëve nga data e miratimit të këtij vendimi, në bashkëpunim me Bashkinë Tropojë, të fillojë procedurat për hedhjen e gjurmës së projektit mbi hartën kadastrale të regjistrimit, sipas planimetrisë së shpronësimit të miratuar dhe të bëjë kalimin e pronësisë për pasuritë e shpronësuara në favor të Bashkisë Tropojë.
Agjencia Shtetërore e Kadastrës, Zyra Vendore Tropojë, të pezullojë të gjitha transaksionet me pasuritë e shpronësuara deri në momentin kur do të realizohet procesi i hedhjes së gjurmës së projektit mbi hartën treguese të regjistrimit.
Ngarkohen Ministria e Infrastrukturës dhe Energjisë, Bashkia Tropojë dhe Agjencia Shtetërore e Kadastrës, Zyra Vendore Tropojë, për zbatimin e këtij vendimi. Ky vendim hyn në fuqi menjëherë dhe botohet në Fletoren Zyrtare.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.