Shpronësimi i dytë i shqiptarëve – Tabaku: Pronat po vidhen për të pasuruar grupin “pronarë të rinj”
Partia Demokratike akuzon se nga viti 2014 Qeveria është angazhuar sistematikisht në drejtim të shpronësimit të dytë të pronarëve, në shërbim të pasurimit të një grupi personash nën termin “pronarë të rinj” që në fakt janë uzurpues të paligjshëm të pronave.
“Politika e ndjekur nga ana e Qeverisë Shqiptare nuk ka qenë në asnjë rast në drejtim të zgjidhjes së problemit të pronës. Qeveria “Rama” është angazhuar në drejtim të shpronësimit të dytë të pronarëve, në shërbim të pasurimit të një grupi personash nën termin “pronarë të rinj” që në fakt janë uzurpues të paligjshëm të pronave”, deklaroi Jorida Tabaku.
Në një deklaratë për mediat Deputetja Jorida Tabaku tha se Qeveria ka bllokuar tërësisht nga viti 2014 vendimet për kthim kompensim, në mënyrë që tokat t’u jepen investitorëve strategjikë për 1 euro, ndërkohë që pronarët e shpronësuar arbitrarisht dëmshpërblehen me vlera qesharake.
“Konkretisht: Kryeministri Rama që prej vitit 2014 nuk ka zbatuar vendimin pilot dhe jurisprudencën e GJEDNJ në lidhje me çështjen e ekzekutimit të vendimeve përfundimtare në lidhje me kthimin dhe kompensimin e pronave. Po e njëjta qeveri që prej vitit 2014 është përpjekur për të eliminuar pronarët fizikë n. Fillimisht ajo përdori transferimin e fondeve nga Agjencia e Kthimit Kompensimit të Pronave tek Ministria e Bujqësisë për t’i transferuar ato kundrejt vlerës 1 euro tek klientë të qeverise. Qeveria Rama miratoi Ligjin për Investime Strategjike që i jep shtetit autoritetin të ndërhyjë në marrëdhënien mes një pronari të tokës dhe investitorit privat. Miratimi i dy VKM-ve të njëpasnjëshme brenda pak muajsh që i japin autoritet qeverisë që të mos ia kthejë pronën të zotit por t’ia japë atë një investitori strategjik”, akuzoi deputetja e PD.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.