Shqipëri-Serbi, hapet dhoma e tregtisë – Një biznes i madh serb do të investojë në vendin tonë
U mbajt në Tiranë mbledhja e parë e Dhomës së Tregtisë Shqipëri-Serbi, me të pranishëm më shumë se 100 përfaqësues nga biznesi i të dyja vendeve. Ministrja për mbrojtjen e sipërmarrjes Sonila Qato, e pranishme në aktivitet, tha se mes dy vendeve ka rritje të shkëmbimeve tregtare dhe e pranisë së biznesit serb, por mund të bëhet më shumë për të forcuar marrëdhëniet ekonomike mes vendeve. I pranishëm ministri serb Goran Knezevic, tha se falë angazhimit dhe dialogut politik Serbi-Shqipëri, janë shkëmbimet tregtare kapin vlerën e 118 milion eurove, por që potenciali është më i madh.
“Kompanitë serbe kanë prezencë të fortë në Shqipëri në sektorët e tregut farmaceutik, të shërbimeve të transportit ajror apo të impianteve të trajtimit të ujit. Rrethi i kompanive serbe në vendin tonë vijon të rritet. Është e qartë se besimi i të gjitha palëve është forcuar ndjeshëm vitin e fundit por gjithashtu besojmë se ka rrugë të reja për të eksploruar dhe forcuar bashkëpunimin”, tha Qato
“Vetëm këtë vit janë shënuar 118.6 milion euro shkëmbime tregtare mes 2 vendeve tona. Me dialog politik bashkëpunimi ynë mund të jetë akoma dhe më i frytshëm. Besoj se projekti për ndërtimin e autostradës së Nishit, do të ndikojë akoma më shumë në rritjen e bashkëpunimit. Ka interes të madh për të përmirësuar edhe më tej ekonomitë në rajon, pavarësisht se kemi ende shumë sfida përpara”, u shpreh ministri serb i ekonomisë Goran Knezevic.
Ndërsa kryetari i dhomës së tregtisë serbe Marko Cadric, tha se Shqipëria është një vend potencial për investime, dhe se së shpejti një kompani e madhe serbe do të vijë për të investuar. Në këtë takim u zgjodh si president i dhomës së tregtisë Isuf Ferra.
Arbër Hitaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.