Shqipëria, destinacion i preferuar për polakët – Në 2018 hynë 34.2% turistë më shumë nga Polonia

Rreth 6 milionë shtetas të huaj e vizituan Shqipërinë gjatë vitit të kaluar, një shifër kjo gati dy herë më e lartë se në vitin 2017. Por, cilat shtetas të huaj e kanë vizituar më së shumti Shqipërinë gjatë 2018-ës?

Referuar të dhënave të Institutit të Statistikave, numri i turistëve polakë ka shënuar rritjen më të madhe  të hyrjes së turistëve në vend gjatë një viti më parë, me 34.2%. Por ndërkohë, gjatë muajit dhjetor ky tregues ka pësuar një rënie të ndjeshme pasi janë numëruar vetëm 455 shtetas polakë që kanë hyrë në vendin tonë, duke u ulur kështu me 32.2%.

Ndërkohë, Shqipëria vijon të mbetet një destinacion i preferuar edhe për turistët fqinjë italianë, numri it ë cilëve u rrit me 20% gjatë 2018-ës. Ndërsa për dhjetorin rritja ka qenë minimale me vetëm 0.9%.

                                                               Burimi: Instat

Ndërkohë, sa i takon shqiptarëve të Kosovës, me sa duket vendosja e tarifës për rrugën e Kombit nuk ka ndikuar në turizëm. Sipas INSTAT, në terma vjetorë mbi 2 milionë shtetas kosovarë kanë vizituar Shqipërinë vitin e kaluar, duke regjistruar një rritje të konsiderueshme me 19.6%.

Ndërkohë, edhe për dhjetorin ky tregues ka rezultuar pozitiv, pasi hyrjet në vend janë rritur me 38.6%, krahasuar me pot ë njëjtën periudhë të një viti më parë.

Shtetasit nga Shtetet e Bashkuara të Amerikës njëkohësisht kanë regjistruar një numër të lartë të hyrjeve në vendin tonë, pasi janë rritur me 13% krahasuar me vitin 2017. Ndërkohë, gjatë dhjetorit mbi 4 mijë shtetas amerikanë kanë vizituar Shqipërinë, duke u rritur me 4.1% krahasuar me po të njëjtën periudhë të 2017.

Genta Dobra/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.