Shqipëria dhe Italia, “të etura” për tregti! Instat: Dhjetori forcon partneritetin
Muaji dhjetor ka “rikthyer” disi në bazë shkëmbimet tregtare të Shqipërisë me partnerët kryesorë tregtarë. Referuar publikimit më të fundit të Institutit të Statistikave mbi Tregtinë e Jashtme, në muajin dhjetor të vitit 2020, Shqipëria ka pasur rritjen më të madhe të eksporteve me Italinë, krahasuar me muajin dhjetor të vitit 2019.
Sipas Instat, kjo rritje është ndjerë me afro 5%. Thënë ndryshe, Shqipëria ka eksportuar 453 milionë lekë më shumë nga dhjetori i vitit paraardhës. Kjo ecuri, edhe pse për një periudhë të shkurtër, mund të jetë një tregues që shkëmbimet tregtarë të Shqipërisë me Italinë po tentojnë të stabilizohen sërish. Kjo pasi viti pandemik, ka krijuar edhe “distancim tregtar” midis dy shteteve.
Nëse shkëputemi nga muaji dhjetor për të parë raportin vjetor të Tregtisë së Jashtme për “vitin pandemik”, vendi me të cilin eksportet kanë pasur uljen më të ndjeshme është pikërisht Italia, me afro 14%, krahasuar me vitin 2019. Thënë ndryshe, bëhet fjalë për 19.5 miliardë lekë më pak eksporte.
E njëjta gjë ka ndodhur edhe me importet të cilat, edhe pse në vitin 2020 kanë pasur uljen më të madhe drejt Italisë, me 7.4%, në muajin dhjetor duket se kanë rikuperuar, duke ndjerë një rritje me afro 20%, krahasuar me dhjetor 2019.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.