Shqipëria dhe Turqia nënshkruajnë marrëveshje për thellimin e bashkëpunimit: “Partnerë strategjikë, aleatë dhe vëllezër”. Fushat kryesore që preken

Kryeministri Edi Rama së bashku me një delegacion ministrash ndodhet në Ankara ku është mirëpritur me një ceremoni zyrtare nga homologu i tij presidenti Erdogan.

Të dy krerët e shteteve dolën në një deklaratë të përbashkët për shtyp ku njoftuan disa vendime të rëndësishme që do të forcojë bashkëpunimin strategjik mes dy vendeve.

“Kemi nënshkruar deklaratën e përbashkët për krijimin e Këshillit të Bashkëpunimit të Lartë, deklaratë që do ta forcojë lidhjen tonë,” – u shpreh Erdogan në fillim të konferencës – “Turqia është partneri i 4-t më i madh. Jemi investitori më i madh në Shqipëri, 3.5 miliardë dollarë, më shumë se 600 kompani që sigurojnë punësim për 15 mijë vëllezër. Parashikojmë të rrisim investimet në turizëm e infrastrukturë për t’i dhënë një dimension tjetër.” – u shpreh më tej në fjalën e tij.

Presidenti turk gjithashtu kujtoi projektet si ai i ndërtimit të mbi 500 banesave në zonën e Laçit për familjet që mbetën pa strehë pas tërmetit të 26 nëntorit 2019 dhe një sërë projektesh të tjera si tregues të vullnetit dashamirës së Turqisë për Shqipërinë.

Ndërkohë kryeministri Rama shprehu falënderimin e tij për mbështetjen e Turqisë, gjithashtu duke zbuluar edhe “bastin” me homologun turk për ndërtimin e spitalit Rajonal të Fierit:

“Jam shumë i kënaqur që Presidenti shprehu gatishmërinë, jo vetëm me fjalë, por edhe ndjekjen e projekteve për ndërhyrje në fushën e shëndetësisë, arsimit dhe kulturës, besoj është lajm i mirë që Universiteti ITU [Universiteti Politeknik i Stambollit], i famshëm për teknologjinë, do të jetë prezent së shpejti në Shqipëri, sikundër jam i lumtur që së shpejti edhe spitali rajonal i Fierit do të jetë realitet,” – tha kryeministri Rama.

Turqia ka rënë dakord të mbështesë sistemin e shëndetësisë me ndërtimin e disa spitaleve, të mundësojë asistencë në kualifikimin e stafit shëndetësorë. Po kështu në fushën kulturës është nënshkruar një marrëveshje për rikonstruktimin e xhamisë së Plumbit në Shkodër, ndërsa në fushën e arsimit është rënë dakord për të mundësuar ndërlidhje të universiteteve dhe shkollave mes dy vendeve dhe hapjen e një filjali të një shkolle të teknologjisë nga Turqia.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.