Shqipëria humbet 9 vende në lirinë ekonomike – Fondacioni Heritage: E 66-ta në botë, për faj të gjyqësorit dhe të drejtave të pronësisë
Shqipëria ka humbur 9 pozicione në renditjen globale të lirisë ekonomike 2021, të publikuar nga Fondacioni Heritage, e që njihet si një ndër publikimet më prestigjioze në këtë drejtim. Këtë vit, Shqipëria renditet në vendin e 66-të në botë, me një pikëzim prej 65.2 pikë, çka përkthehet në një rënie me 1.7 pikë krahasuar me një vit më parë, kur renditeshim në vendin e 57-të në botë. Dy vite më parë ndërkohë, Shqipëria renditej në vendin e 52-të në nivel global.
Fondacioni Heritage e justifikon këtë rënie në renditje dhe pikëzim me përkeqësimin e të drejtave të pronës dhe të efektivitetit të gjyqësorit. Ndër vendet europiane, Shqipëria renditet e 35-ta ndër 45 shtete, ndërkohë që pikëzimi i përgjithshëm rezulton të jetë nën mesataren globale, thuhet mes rreshtave në raport. Përkeqësimi i vitit të fundit ka ngadalësuar progresin drejt mesatares europiane.
“Pavarësisht kësaj, qeveria ka menaxhuar të mbajë kontrollin mbi deficitin buxhetor dhe borxhin publik”, thuhet më tej. “Për të avancuar si kandidate drejt Bashkimit Europian, Shqipëria duhet të forcojë institucionet e sundimit të ligjit, si dhe të përmirësojë pikëzimin në drejtim të të drejtave të pronësisë, efektivitetit të gjyqësorit, si dhe të integritetit të qeverisë”-nënvizon Fondacioni për Shqipërinë.
Sa i përket indikatorëve, përkeqësim regjistron edhe liria e tregtisë si dhe ajo e punës, ndërkohë që në përmirësim regjistrohen: barra e taksave, shëndeti fiskal, liria e biznesit, ajo monetare si dhe integriteti i qeverisjes.
Shqipëria klasifikohet si një vend kryesisht i lirë dhe lë pas në renditje vende si: Italia, Bosnje Hercegovina, Mali i Zi, Greqia apo Kroacia. Kosova ndërkohë renditet në vendin e 58-të në nivel global. Sa i përket kreut të renditjes, mbahet nga Singapori, i ndjekur nga Zelanda e Re dhe Australia.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.