Shqipëria, më pak konkurruese – WEF: Humbet 5 pozicione në raportin global, zbret në vendin e 81-të
Shqipëria ka humbur plot 5 pozicione në raportin global të konkurrueshmërisë 2019 të sapo publikuar nga Forumi Ekonomik Botëror. Ky dokument, së bashku me atë të të bërit biznes nga Banka Botërore është padiskutim më i rëndësishmi në nivel global, dhe shërben si një kartolinë e vendeve të ndryshme të botës për investitorët e huaj. Këtë vit, vendi ynë zë pozicionin e 81-të në botë, ndër 141 ekonomi të ndryshme të globit.
Rënia në renditje e Shqipërisë është padiskutim një shuplakë e fortë për Shqipërinë dhe aspiratën për të tërhequr sa më shumë investime. Krahasuar me rajonin, Maqedonia e Veriut dhe Bosnje Hercegovina janë më keq se në në renditje, ndërkohë që Serbia dhe Mali i Zi janë ndjeshëm më lart në renditjen e përgjithshme. Dy vite më parë ndërkohë, Shqipëria linte pas në renditje edhe Serbinë me Malin e zi.
Indeksi bazohet mbi 98 nën-indikatorë në 12 shtylla të ndryshme, dhe në secilin prej tyre matet performanca e një prej 140 ekonomive në krahasim me performuesin më të mirë. Performancën më të mirë ndër 12 shtyllat, Shqipëria e ka në atë të tregut të punës, ku renditet e 38-të në botë, duke pasur një pikëzim më të lartë se mesatarja europiane apo e Amerikës së Veriut, por në rënie krahasuar me raportin e vitit të kaluar. Indikatorë të tjerë pozitivë rezultojnë ata të shëndetit, aftësive dhe dinamizmit të biznesit.
Performanca më e dobët ndërkohë vjen në drejtim të masës së tregu, dhe aftësive inovatore, në vendin e 111-të dhe 110-të respektivisht. Rënia me 5 pozicione në renditje vjen kryesisht si pasojë e rënies drastike në nën-indikatorin e produktit të tregut, nga vend i 58-të një vit më parë, në të 75-tin sot, si dhe në atë të dinamizimit të tregut, nga vend i 48-të në të 63-tin. Rënie të ndjeshme regjistrojnë edhe nën-indikatorët e institucioneve si dhe ai i stabilitetit makro-ekonomik. Në nivel global, në vend të parë qëndron Singapori, që i ka “rrëmbyer” kurorën Shteteve të Bashkuara të Amerikës, ndërkohë që vendin e fundit e zë Çadi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.