Shqipëria merr kredi për të luftuar Covid-in! Si do të përdoren 60 milionë euro të Bankës për Zhvillim të Këshillit të Europës
Qeveria shqiptare ka depozituar për ratifikim në Kuvend marrëveshjen e huasë me Bankën për Zhvillim të Këshillit të Evropës, për mbështetjen e përpjekjeve të Republikës së Shqipërisë për zbutjen e pandemisë COVID-19, në shumën prej 60 milionë eurosh.
“Marrëveshja ka si qëllim kryesor që, nëpërmjet instrumentit të mbështetjes buxhetore, të sigurojë fondet financiare të nevojshme për të financuar shpenzimet buxhetore për përballimin e situatës së krijuar nga pandemia e COVID-19. Objektivi i instrumentit është të ndihmojë vendin në përpjekjet për të siguruar pajisje, barna dhe shërbime mjekësore për ata të cilët janë prekur nga COVID-19. Gjithashtu, nëpërmjët këtij projektligji do të mundësohet blerja e vaksinave të COVID-19, për vaksinimin e popullatës më qëllim mbrojtjen e tyre nga rreziqet që paraqet COVID-19” shkruhet në relacionin e projektligjit.
Kjo mbështetje do të shërbejë për mbrojtjen e shëndetit publik, parandalimin dhe reagimin ndaj rrezikut që paraqet COVID-19, si dhe fuqizimin e sistemeve kombëtare të gatishmërisë së shëndetit publik.
Mbështetja e sektorit shëndetësor për të reaguar ndaj COVID-19 menjëherë dhe në një periudhë afatmesme konsiston në:
– fuqizimin e sistemit shëndetësor për rritjen e kapaciteteve për trajtimin e rasteve të COVID-19 dhe sëmundjeve që lidhen me të;
– sigurimin e vaksinës së COVID-19 për mbrojtjen e popullatës nga rreziqet e COVID-19.
Përmes këtij projekti synohet të garantohet ofrimi i shërbimeve mjekësore, si dhe sigurimi i materialeve e pajisjeve mjekësore të rëndësishme për të prekurit nga COVID-19 e, më konkretisht, do të mundësohen:
– punësimi i personelit mjekësor shtesë, doktorë, infermierë dhe ndihmësinfermierë;
– fondet e nevojshme për pagat e punës jashtë orarit për personelin mjekësor dhe jomjekësor, që shërbejnë në institucionet shëndetësore të trajtimit të pacientëve me COVID-19;
– blerja e pajisjeve mjekësore;
– sigurimi i produkteve farmaceutike të domosdoshme, si barna mjekësore, kitet diagnostikuese për koronavirus etj;
– sigurimi i materialeve të tjera mjekësore, si maska, doreza dhe dizinfektantë;
– sigurimi i pajisjeve mbrojtëse personale për punonjësit e kujdesit shëndetësor;
– rehabilitimi / përshtatja e spitaleve;
– blerja e vaksinave të COVID-19, përfshirë kostot e transportit dhe magazinimit
Huaja e akorduar ka një afat maturimi 15 vjet, në varësi të periudhës maksimale pa pagesë principali të përcaktuar në momentin e disbursimit maturimi ulet (p.sh. nëse periudha pa pagesë principali kërkohet 3 vjet, maturimi i huas bëhet 12).
Interesi do të përcaktohet mbi bazën e tregut në momentin e disbursimit.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.