Shqipëria më mirë se Europa – Energjia e rinovueshme, ndër vendet me normën më të lartë

Të dhënat e fundit të publikuara nga Eurostat tregojnë se Shqipëria është një prej vendeve me normën më të lartë të burimeve të rinovueshme të energjisë në Europë. Të dhënat krahasuese të Eurostat i referohen vitit 2016 dhe flasin për një normë të konsumit të energjisë së rinovueshme në 37.1%.

Më mirë se Shqipëria në këtë drejtim është Suedia, Islanda, Norvegjia apo Mali i Zi. Mesatarja e Bashkimit Europian ndërkohë fiksohet në vetëm 17%, pra thuajse sa gjysma e normës së vendit tonë.

Objektivi i Shqipërisë për vitin 2020 ndërkohë fiksohet në 38%, ç`ka duket mëse i realizueshëm duke pasur parasysh ecurinë e viteve të fundit.

Në vitin 2004, kjo normë në vendin tonë fiksohej në 27.4%, pra thuajse 10 pikë përqindje poshtë nivelit aktual. Progresi është i ndjeshëm.

Performanca e mirë e Shqipërisë në krahasim me të tjerët në këtë drejtim vjen ekskluzivisht si pasojë e varësisë së sistemit energjetik nga burimet hidrike.

Këto të fundit plotësojnë thuajse 100% të kërkesës në treg, ndërkohë që në vende të ndryshme europiane energjia bërthamore është mjaft e përhapur.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.