Shqipëria ndryshon politikën-Drejt krijimit të vizës elektronike për të huajt!
Ministria e Brendshme dhe ajo e Financave kanë shtruar për diskutim një projektligj që sjell ndryshime në politikën e vizave të Shqipërisë.
Projektligji parashikon ndër të tjera edhe krijimin e mekanizmave të nevojshëm për lëshimin e vizave elektronike online, duke synuar zgjidhjen e problematikave të ndeshura gjatë zbatimit të tij, lidhur me pamundësinë për të mbuluar shumë vende me misione diplomatike apo poste konsullore, që do të lëshonin vizë hyrëse në territorin e Republikës së Shqipërisë për të huajt, që synojnë ta vizitojnë atë.
“Ndryshimet e propozuara synojnë implementimin e sistemit të lëshimit të vizës elektronike, i cili synon integrimin e sistemeve operative në të gjitha institucionet përkatëse të ngarkuara me verifikimin e aplikimeve për vizë dhe miratimin e tyre, në funksion të një procedure të thjeshtuar, të përshpejtuar, efikase, të sigurt dhe në respekt të standardeve të kërkuara, dhe që do të reduktojë ndjeshëm kohën e ofrimit të këtij shërbimi për marrjen e një vize nga shtetasit e huaj” shkruhet në relacionin e projektligjit.
Ky projektligj parashikon se për të aplikuar për vizë, aplikuesi duhet të paraqitet personalisht në konsullatë të paktën kur aplikon për herë të parë. Pas aplikimit për herë të parë, në rast se e ka të pamundur, aplikuesi përjashtohet nga detyrimi i paraqitjes personale për një periudhë prej 59 muajsh nga aplikimi i parë.
Duke u bazuar në sa më sipër, është vlerësuar edhe ndërmarrja e kësaj iniciative ligjore, e cila synon rregullimin ligjor për mundësinë që aplikanti pas marrjes së vizës pëe herë të parë, pra përgjatë periudhës 59 mujore, të mund të aplikojë për vizë elektronike online.
Aplikimi i vizës online duke marrë në konsideratë kushtet dhe mundësitë e RSH do të:
-Reduktojë ndjeshëm kohën e marrjës së shërbimit;
-Krijojë lehtësira për shtetasit e huaj që aplikojnë për viza;
-Evitojë koston e prodhimit të vizave sticker;
-Shkurtojë procedurat dhe dërgimin e dokumentacionit të nevojshëm, pasi gjithçka do të jetë online dhe e aksesueshme nga të gjitha strukturat për trajtimin e vizave;
-Ndikojë pozitivisht në rritjen e numrit të vizitorëve dhe turistëve;
-Të gjitha institucionet e shtetit shqiptar përgjegjëse në trajtimin e procedurës së vizës, si: Drejtoria e Përgjithshme e Kufirit dhe Migracionit si dhe Shërbimi Informativ Shtetëror, do të jenë njëlloj të përfshira si me procedurat e vizës sticker;
-Informacioni i nevojshëm për vizën elektronike do të merret dhe aksesohet nga të gjitha institucionet e sipërpërmendura;
-Krijojë lehtësi dhe transparencë për të gjitha strukturat e përfshira në këtë proces;
-Integrimi i të gjitha Pikave të Kalimit Kufitar të RSh-së në këtë proces është një tjetër element shtesë për sigurinë, në zbatimin për lëshimin e vizës elektronike online;
-Nuk cenon cilësinë e këtij shërbimi, (për ofrimin e vizës elektronike);
-Viza do të jetë e vlefshme vetëm për territorin e RSh-së;
Gjithashtu, ndryshimet e propozuara synojnë implementimin e sistemit të lëshimit të vizës online, i cili synon integrimin e sistemeve operative në të gjitha institucionet përkatëse të ngarkuara me verifikimin e aplikimeve për vizë dhe miratimin e tyre, në funksion të një procedure të thjeshtuar, përshpejtuar, efikase, të sigurt dhe në respekt të standardeve të kërkuara, dhe do të reduktojë ndjeshëm kohën e ofrimit të këtij shërbimi për marrjen e një vize për të huajt.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.