Shqiponja e parë e Artë e trajtuar në Shqipëri/ AKMZ informon se çfarë ndodhi pasi iu vendos pajisja GPS
Në 16 Shkurt 2021, ‘Rangers’ të Administratës së Zonave të Mbrojtura të Qarkut të Beratit gjetën një individ të ri të Shqiponjës së Artë (Aquila chrysaetos) në kushte të dobëta dhe të paaftë për të fluturuar.
Agjencia e Zonave të Mbrojtura njofton se shpendi u gjet në rajonin e Skraparit dhe u transportua në Qendrën e Rehabilitimit të Shpendëve të Egra në Parkun Kombëtar Divjakë-Karavasta.
“Ekzaminimi i radiologjisë konfirmoi se shpendi është qëlluar me armë zjarri dhe kishte marrë saçme plumbi në gjoks dhe krahë, por fatmirësisht jo në organe jetësore.Shpendi u trajtua në këtë qendër deri në 13 Prill 2021, dita që edhe u lëshua.
Përpara lëshimit, falë mbështetjes së ‘ Prespa Transboundary Reserve’’ një pajisje GPS iu vendos shpendit në mënyrë që të gjurmohet dhe të studiohet lëvizja e tij. Ky shpend u quajt ‘‘ Mati’’ dhe përfaqëson Shqiponjën parë të Artë të trajtuar ndonjëherë në Shqipëri.
Në foto ju keni mundësinë të shikoni edhe lëvizjet që Mati ka kryer.Pasi u la e lirë në 13 Prill, ajo kaloi rreth 24 orë në Parkun Kombëtar të Prespës në anën shqiptare. Të nesërmen më 14 Prill Mati kaloi kufirin me Greqinë (jo shumë larg kufirit shqiptar) dhe qëndroi deri në 30 Prill, dite kur kaloi për herë të parë kufirin për në Shqipëri, pastaj u zhvendos përsëri në të njëjtën zonë në Greqi deri më 26 Maj.
Pas kesaj u kthye në Shqipëri dhe që nga ajo kohë po qëndron në Shqipëri,ekzaktësisht në zonën ku u gjet e plagosur. Deri tani ka përshkuar një distancë totale prej 1978 km dhe madhësia e territorit të vizituar në të dy vendet është rreth 6800 km katrorë.Ajo tani ndodhet ne habitatin e saj natyror dhe gezon shendet te plote” njofton AKZM (Agjencia Kombëtare e Zonave të Mbrojtura).
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.