Shqiptarët, 1147 mld lekë kursime – Janë rritur me 60% në shtatë vitet e fundit
Shqiptarët zotërojnë afro 1.15 trilionë lekë në formën e kursimeve të investuara në instrumente financiare. Sipas të dhënave nga Banka e Shqipërisë, kursimet e individëve u rritën më tej gjatë vitit 2017.
Krahasuar me vitin 2016, aktivet financiare të zotëruara nga individët u rritën me rreth 20 miliardë lekë. Ndërsa krahasuar me vitin 2010, kursimet e familjeve shqiptare janë rritur me afro 60%. Rritja ka qenë veçanërisht e ndjeshme deri në vitin 2013, ndërsa pas këtij viti kursimet kanë vazhduar rritjen, por me ritme më të ulëta.
Nga njëra anë, prirja për kursim është e kuptueshme në kushtet e një cikli rënës të ekonomisë dhe shtimit të pasigurisë mes individëve. Por, nga ana tjetër, rritja e kursimeve të formalizuara me 60%, gjatë një periudhë krize relative, është një statistikë mbresëlënëse.
Në pjesën dërrmuese, kursimet e shqiptarëve investohen në depozita bankare. Në fund të vitit 2017, individët zotëronin depozita në lekë dhe valutë në vlerën e 937 miliardë lekëve ose rreth 82% të kursimeve totale të investuara në sistemin financiar.
Pjesa tjetër është e investuar në tituj borxhi të qeverisë shqiptare, fonde investimi dhe fonde të pensioneve private. Vitin e kaluar u vërejt një rritje e investimeve në obligacione, të cilat garantojnë kthime më të larta, për shkak të afateve më të gjata të maturimit.
Rritja e kursimeve do të rezultonte edhe më e lartë, nëse kemi parasysh efektin e kursit të këmbimit. Pjesa më e madhe e depozitave bankare dhe një pjesë e konsiderueshme e kontributit në fondet e investimit janë në euro, ndaj vlera e dhënë në lekë për qëllime raportimi është ndikuar pjesërisht nga zhvlerësimi i monedhës europiane.
Shqipëria ka një raport kursimesh ndaj prodhimit kombëtar ndjeshëm më të lartë krahasuar me vendet e tjera të rajonit.
Kjo ka ndihmuar në uljen e varësisë së sistemit bankar nga burimet e jashtme të financimit dhe është një levë e rëndësishme për të mundësuar financimin e investimeve të reja për ndërmjetësimit financiar.
Prania e sasive të mëdha të kursimeve nga individët krijon njëkohësisht potenciale të rëndësishëm për të mund të zhvilluar më tej tregun financiar dhe për të diversifikuar mjetet e investimit të këtyre kursimeve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.