Shqiptarët konsumojnë 3.2 kg mish në muaj – Sa gjysma e mesatares së Bashkimit Europian
Qytetarët shqiptarë vijojnë të konsumojnë një sasi shumë të ulët të mishit, pavarësisht se është një ndër produktet bazë të shportës, dhe po ashtu përpos rritjes së vazhdueshme dhe investimeve në teknologji të industrisë së përpunimit të mishit. Kështu sipas një studimi sektorial mbi këtë industri, bëhet me dije se qytetarët shqipitarë konsumojnë mesatarisht 39.1 kg mish për frymë në një vit apo 3.2 kg në muaj. Me këtë sasi konsumi, Shqipëria arrin vetëm gjysmën e mesatares së BE-së sa i takon konsumit te mishit për frymë e cila regjistrohet në 80.4 kg.
Shifrat e zbardhura i përkasin vitit 2018, dhe sipas studimit përgjatë periudhës 2014-2018, konsumi shqiptar për frymë i këtij produkti ka mbetur në të njëjtat nivele. Shkak, mesa duket është zëvendësimi i këtij produkti me drithra të ndryshme, por edhe kosto e lartë e tij, ku çmimi mesatar i shitjes në treg i mishit të gjedhit është afro në 900/lekë për kg, çka bën që shumica e familjeve shqiptare të “kursejnë” në këtë drejtim për shkak të të ardhurave të ulëta që kanë. Më së shumti konsumohet mishi i gjedhit, dhe më pak mishi i derrit dhe shpendëve.
Referuar dokumentit, Shqipëria ka një deficit të rëndësishëm tregtar në mish dhe produkte të përpunuara të mishit në vlerën 91 milionë euro në vitin 2019. Gjatë këtij viti, Shqipëria importoi 91.5 milionë euro mish dhe produkte të përpunuara të mishit dhe eksportoi 0.5 milionë euro, ku SHBA, Brazili dhe Greqia janë partnerët kryesore. Megjithatë preferenca e konsumatorëve mbetet për “mishin e freskët”, që do të thotë nga kafshët e therura së fundmi. Gjithashtu, preferohen “pulat e fermës” mbi pulat “industriale”. Ndërsa prodhimi vendas i mishit konsiderohet cilësi më e mirë në krahasim me mishin e importuar dhe qytetarët janë të gatshëm të pagajnë më shtrenjt për blerjen e produkteve vendase.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.