Shqiptarët, më të varfër – Basha: Nuk përballojnë dot faturat dhe taksat e larta
Mbyllja e bizneseve, ulja e fuqisë blerëse dhe mungesa e investimeve, sipas kreut të opozitës kanë bërë që shqiptarët të jenë më të varfër. Nga çadra e lirisë Basha ka kërkuar që t’i jepet fund sakrificave të qytetarëve të cilët nuk mund të përballojnë as jetesën e tyre për shkak të faturave dhe taksave që rriten çdo ditë.
“Rilindja e kriminalizuar e ka shkatërruar ekonominë shqiptare. Me taksa të larta, me çmimin e karburantit dhe të energjisë në qiell, i kanë vënë kazmën çdo sipërmarrjeje. Biznesi shqiptar sot është jokonkurrues edhe me bizneset e Kosovës e Maqedonisë. Vendet e punës mbyllen me një shpejtësi tragjike. Investime të reja nuk ka. Fuqia blerëse e shqiptarit është më e ulëta në Ballkan dhe krahasohet me vende të Afrikës Ekuatoriale”, tha kreu i PD-së.
Sipas Bashës ndihma ekonomike është e pamjaftueshme dhe qytetarët janë nën stresin e pamundësisë për të paguar faturat e energjisë elektrike.
“Kush është në marrëdhënie pune është nën presionin e përditshëm të pasigurisë: edhe sa do ta ketë atë vend pune. është nën presionin e përditshëm të çmimeve që rriten, të fuqisë blerëse që bie, të faturave dhe taksave që mbijnë si kërpudhat pas shiut për të rënduar edhe më shumë gjendjen ekonomike dhe gjendjen psikologjike të prindërve dhe të fëmijëvëe, që shohin fenomenin më të dhimbshëm në familje: mungesën e shpresës dhe mundësive të prindërve për t’iu ardhur në ndihmë“, u shpreh Basha.
Kreu i opozitës foli nga çadra e lirisë, ku për 68 ditë me radhë kërkojnë që në vend të krijohet qeveri teknike dhe të sigurohen zgjedhje të lira dhe të ndershme.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.