Shqiptarët “ngopen” me muzetë, kalatë dhe parqet arkeologjike, ulen vizitat. Ndryshe ndodh me të huajt
Shqiptarët kanë vizituar më pak muzetë, kalatë, monumentet e parqet arkeologjike në tremujorin e dytë të këtij viti, krahasuar me të njëjtën periudhë të një viti më parë.
Sa i përket vizitave në muze, rezulton se në tremujorin e dytë ka pasur 47 mijë e 66 vizitorë, nga 59 mijë e 716 që ishte në të njëjtën periudhë të një viti më parë. Rënia është me 21.2 %.
E njëjta tendencë konstatohet me kalatë e monumentet, ku në tremujorin e dytë i vizituan 43 mijë e 254 vizitorë nga 49 mijë e 608 që ishin në të njëjtën periudhë të një viti më parë. Rënia është me 12.8 %.
Po ashtu, edhe Parqet arkeologjike po vizitohen më pak nga shqiptarët. Në tremujorin e dytë të këtij viti parqet arkeologjik u vizituan nga 62 mijë e 877 vizitorë vendas, nga 69 mijë e 609 që ishin një vit më parë. Rënia është me 9.7 %.
Rritje te vizitorëve të huaj
Referuar të dhënave të Instat, rezulton se ka pasur një rritje të numrit të vizitorëve të huaj në muze, kala e parqe arkeologjike. Nga 44 mijë e 666 vizitorë të huaj, muzetë këtë vit u vizituan nga 56 mijë e 470 të tillë. Rritja është me 26.4 %. Po ashtu, edhe kalatë e monumentet nga 47 mijë e 900 që ishin vitin e kaluar, këtë vit u vizituan nga 54 mijë e 182 vizitorë të huaj. Rritja është me 13.1 %.
Ndërsa parqet arkeologjike nga 50 mijë e 658 vizitorë të huaj, këtë vit u vizituan nga 67 mijë e 907 vizitorë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.