Shqiptarët nuk e kanë punën të sigurt – Dy në tre është i vetëpunësuar, i përkohshëm ose part-time
Më shumë se një në tre shqiptarë që është në punë nuk ka askënd mbi krye që ta ketë punësuar dhe që ta drejtojë në punën e përditshme. Sipas të dhënave më të fundit të Bankës Botërore, e që i referohen vitit të kaluar, Shqipëria ka një normë vetëpunësimi në 35%, që është më e larta në rajon, gjë që dallohet mjaft qartë edhe nga grafiku. Mesatarja e rajonit fiksohet në rreth 23%. Vetëpunësimi i referohet atyre që kanë hapur një aktivitet të tyre, dhe që punojnë në atë aktivitet.
Në Shqipëri, në pjesën dërrmuese, vetepunësimi është në sektorin bujqësor, por edhe në lokalet apo dyqanet e vogla apo edhe bizneset e akomodimit. Pra, një në tre shqiptarë të punësuar nuk i jep kurrëkujt llogari për punën e tij. Por, kjo është më shumë rrjedhojë e kushteve në të cilat është gjendur vazhdimisht tregu i punës në vend, sesa rrjedhojë e një zgjedhje personale. Tregu i punës në Shqipëri, në mungesë edhe të një ekonomie prodhuese, ka vuajtur vazhdimisht krijimin anemik të vende të reja. Kjo ka bërë që shumë shqiptarë të shohin hapjen e një aktiviteti privat si mënyrën e vetme për të përballuar jetesën.
Nga ana tjetër, një tjetër e dhënë e Bankës Botërore arrin në përfundimin se, 1 në 5 shqiptarë të punësuar realisht ka një punë part-time. Në vendin tonë norma e punësimit part-time fiksohet në 20%, më shumë se çdo vend tjetër i rajonit. Siç duket edhe nga grafiku, mesatarja e rajonit fiksohet në gjysmën e kësaj norme, rreth 11%. Punësimi i përkohshëm ndërkohë fiksohet në 11% në vendin tonë. Të tre indikatorët e çojnë normën në 67%. Dy në tre shqiptarë janë në marrëdhënie pune jo të rregullta, pra, ose kanë punësuar veten e tyre, ose kanë një punë jo 8 orarëshe por vetëm part-time, ose janë thjesht të përkohshëm në punën e tyre.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.