Shqiptarët “pushtojnë” Malin e Zi – Në dimër janë turistët numër një, në verë “aktivizohet” patriotizmi
Të dhënat e sapopublikuara nga Instituti i Statistikave në Malin e Zi tregojnë se gjatë muajit Dhjetor të vitit që sapo lamë pas, shqiptarët ishin grupi më i madh i turistëve në vend, me 4973 hyrje, më shumë se kushdo nacionalitet tjetër, e madje edhe më shumë se serbët, të cilët njihen për afrimitetin me Malin e Zi. Gjatë Dhjetorit shqiptarët përbënin kështu 21.2% të totalit të turistëve në Malin e Zi.
Të dhënat tregojnë gjithashtu se, shqiptarët kanë qendruar mesatarisht nga dy netë nëpër hotele, pasi numërohen 8496 akomodime nëpër hotelet e fqinjëve gjatë Dhjetorit. Muaji i fundit i vitit preferohet nga shqiptarët që vizitojnë Malin e Zi për shkak të festave dhe dëborës, duke preferuar kështu vende me dëborë si Kolasin.
Tendenca e shqiptarëve për të vizituar Malin e Zi gjatë muajve të dimrit konfirmohet edhe nga të dhënat e muajit janar të vitit të kaluar, kur shqiptarët zinin plot 22% të totalit të turistëve në vend. Supremacia e shqiptarëve mes turistëve në Mal të Zi vazhdon deri në Mars. Edhe gjatë muajve Prill-Maj ka hyrje të shumta, por shqiptarët zbresin në renditje. Muajit e verës ndërkohë shënojnë një rënie të ndjeshme, çka do të thotë se shqiptarët nuk e tradhtojnë vendin e tyre për të bërë plazh.
Sipas përllogaritjeve të Scan, mbi të dhënat e institutit të statistikave të Malit të Zi, rezulton se, përgjatë të gjithë vitit të kaluar, 36038 shtetas shqiptarë vizituan Malin e Zi, ose 4.2% e totalit të 843609 turistëve që hynë në vend.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.