Shqiptarët që ikin e të huajt që vijnë! Çdo vit mesatarisht 3 mijë shtetas të huaj marrin leje për të punuar në Shqipëri
Vitet e fundit, Shqipëria ka njohur flukse të larta migratore drejt vendeve të Bashkimit Evropian e kërkesa të larta për emigrim kundrejt Shteteve të Bashkuara të Amerikës. Arsyet janë padyshim ekonomike e kanë si synim rritjen e shpejtë të standardit të jetesës. Megjithatë, edhe pse është më shumë se 1/4 e popullsisë që ka shfaqur vullnetin për t’u larguar, Shqipëria duket se paraqitet një vend interesant emigrimi për shtetas të huaj. Referuar të dhënave zyrtare të Ministrisë së Mirëqenies Sociale gjatë periudhës 2011-2015 numri i të huajve që emigrojnë drejt Shqipërisë për motive punësimi ka ardhur gjithnjë e në rritje. Sipas të dhënave zyrtare, mesatarisht çdo vit lëshohen rreth 3 mijë leje pune për shtetas të huaj.
Rajoni që ka numrin më të lartë të shtetasve të huaj të pajisur me leje pune është Tirana me rreth 50% të lejeve të punës. Referuar studimit, vendin e parë e zënë kërkesat për leje pune për kategorinë e punëmarrësve. Në vend të dytë janë kërkesat e të vetëpunësuarve, ndërsa në vend të tretë janë kërkesat e investitorëve. Sektori më i kërkuar për punësimin e të huajve është ndërtimi, i ndjekur nga shërbimet, industria nxjerrëse dhe tregtia. Sipas shtetësisë, vendin e parë e zënë shtetasit nga vendet joanëtare të Bashkimit Evropian; turqit, të ndjekur nga kinezët dhe kanadezët. Referuar studimit që nuk përfshin emigrantët nga vendet e Bashkimit Evropian, SHBA-të dhe Kosova që nuk kanë detyrimin për t’u pajisur me leje pune, të huajt e pajisur me leje pune më së shumti ishin meshkuj me 86.2%-92%.
Sipas tipit të lejes së punës, dominon kategoria e punëmarrësve me 82% të lejeve të punës. Edhe gjatë vitit 2015, shtetasit turq mbajnë vendin e parë për lejet e punës dhe ka pasur një rritje me 55% të totalit Po ashtu, sektori më i preferuar ka qenë ndërtimi. E sa i përket kërkesave për t’u pajisur me vërtetime punësimi, në vend të parë janë italianët, të ndjekur nga shqiptarët e Kosovës.
Bizneset e të huajve, 70% janë ndërmarrje të vogla
Sipas Regjistrit Statistikor të Ndërmarrjeve, përgatitur nga Instituti i Statistikave, për vitin 2015, në Shqipëri rezultonin 5939 ndërmarrje me kapital të huaj apo të përbashkët. Kuptohet se jo të gjitha këto ndërmarrje përfaqësojnë investitorë të mëdhenj, përkundrazi: në pjesën dërrmuese bëhet fjalë për ndërmarrje të vogla, me qëllim vetëpunësimin. Mbi 70% e numrit të përgjithshëm të ndërmarrjeve kanë përmasa të vogla, me një deri në katër të punësuar. Shumica e tyre, janë sipërmarrje personale apo familjare të shtetasve të huaj që kanë vendosur të jetojnë dhe punojnë në Shqipëri.
Shqiptarët e rikthyer
Edhe pse në mbarë vendin janë hapur 36 sportele për regjistrimin e emigrantëve shqiptarë të rikthyer e ka një strategji të posaçme për riintegrimin e tyre, të dhënat pranohet se janë të paplota. Një pjesë e tyre nuk preferojnë të regjistrohen e kjo duket se i dedikohet faktit se ata kanë ardhur e vijojnë të vijnë me një plan të mirëmenduar për sigurimin e të ardhurave. Referuar të dhënave zyrtare, nga janari 2011 deri në qershor 2015 në sportelet e zyrave të emigracionit janë regjistruar 4673 emigrantë shqiptarë të kthyer. Femrat përbëjnë gjysmën e shtetasve shqiptarë të kthyer e të regjistruar. Numri i madh i kthimeve është familjar dhe afatgjatë, ndaj kjo kategori shfaq nevojën për mbështetje për riintegrim. Vendet kryesore nga ku janë kthyer emigrantët shqiptarë janë Greqia dhe Italia, por në këtë rast Greqia dominon me 80% të të kthyerve dhe si shkak i kthimit vlerësohet papunësia e vendit pritës.
Lejet e punës
-Për vitin 2011 janë pajisur me leje pune 2300 shtetas të huaj
-Për vitin 2012 janë pajisur me leje pune 2499 shtetas të huaj .
-Për vitin 2013 janë pajisur me leje pune 2958 shtetas të huaj
-Për vitin 2014 janë pajisur me leje pune 3443 shtetas të huaj
-50% e lejeve të punës i përkasin rajonit të Tiranës
Sektorët e preferuar
-Vendin e parë e zënë kërkesat për leje pune për kategorinë e punëmarrësve. Në vend të dytë janë kërkesat e të vetëpunësuarve, ndërsa në vend të tretë janë kërkesat e investitorëve.
-Sektori më i kërkuar për punësimin e të huajve është ndërtimi, i ndjekur nga shërbimet, industria nxjerrëse dhe tregtia
-Sipas shtetësisë, vendin e parë e zënë shtetasit nga vendet joanëtare të Bashkimit Evropian; turqit, pasuar nga kinezët dhe kanadezët.
SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.