Shqiptaret “shtyjnë” me 3 muaj mëmësinë – Eurostat: Bëhen nëna për herë të parë mesatarisht në 26.4 vite
Mosha mesatare në të cilën femrat shqiptare bëhen nënë për herë të parë është rritur me 3 muaj, tregojnë të dhënat më të fundit të eurostat, të cilat i referohen vitit 2018, dhe fiksohet në 26.4 vite. Në 2017-ën, fiksohej në 26.1 vite tregojnë të dhënat më të fundit të eurostat. Për Shqipërinë të dhënat ekzistojnë që prej vitit 2013, kur ky indikator fiksohej në 25.5 vite. Viti 2018 ndërkohë, regjistron kështu rritjen më të madhe vjetore.
Krahasuar me vendet e Bashkimit Europian ndërkohë, vetëm bullgaret duket se bëhen nëna për herë të parë në një moshë më të re se shqiptaret. Në të gjithë Bashkimin Europian mosha mesatare e nënave të reja fiksohet në 29.3 vite, thonë të dhënat e fundit të Eurostat. Vende si Turqia, Bjellorusia, Armenia, Azerbajxhani apo Gjeorgjia ndërkohë, kanë një moshë mesatare më të re se ne në Europë, thonë të dhënat e agjencisë europiane të statistikave.
Për pjesën më të madhe të vendeve të tjera të rajonit ndërkohë, mungojnë të dhënat ose janë jo të rifreskuara, me përjashtim të Serbisë ku indikatori fiksohet në 28.1 vite. Për Kosovën dhe Maqedoninë e Veriut, të dhënat e vitit 2017 sinjalizojnë 26.9 vite moshën mesatare të të bërit nënë për herë të parë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.