Shtëpia e Bardhë rrit “ofertën” – E çon në 1.8 trilionë dollarë paketën e stimujve, pritet përgjigja e demokratëve

Shtëpia e Bardhë i ka bërë një tjetër ofertë demokratëve, me qëllimin për të arritur një marrëveshje përpara zgjedhjeve të muajit të ardhshëm. Marrëveshja i referohet paketës së stimujve për ekonominë e goditur rëndë nga pandemia. Më parë, adminstrata e Trump kishte ofruar 1.6 trilionë dollarë, ndërsa ofertat e fundit flet për 1.8 trilionë dollarë, ose 400 miliardë më pak se ajo që kërkojnë demokratët. Dhoma e ulët e parlamentit amerikan, e kontrolluar nga demokratët disa ditë më parë kaloi paketën 2.2 trilionë dollarëshe të stimujve, dhe që prej atëherë, palët kanë dëshuar të gjejnë një konsensus.

Sekretari amerikan i thesarit, Steven Mnuchin si dhe kryetarja e kongresit, Nancy Pelosi kanë folur për më shumë se 30 minuta të premten pasdite për këtë ngërç. Mësohet se, Mnuchin ka propozuar ndër të tjera që paketa e re të adresojë disa nga shqetësimet e demokratëve. “Unë do të doja të shihja një paketë stimujsh edhe më të madhe se ajo që ofrojnë demokratët ose republikanët”-deklaroi Donald Trump së fundmi, duke e bërë edhe më konfuze situatën. Edhe nëse Shtëpia e Bardhë dhe demokratët arrijnë në marrëveshje, pakti do ta ketë të vështirë të marrë konsensusin në Senatin e kontrolluar nga republikanët.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.