Shteti, jo më rekurse në Gjykatën e Lartë, kush përfiton – Do shkarkohen dosjet me vlerë më pak se 40 paga, por dhe paditë civile nën 150 mijë lekë!

Siç qe paralajmëruar më herët nga Gjykata e Lartë, Këshilli I Ministrave ka miratuar Udhëzimin që detyron institucionet shtetërore të heqin dorë nga rekurset me vlera të vogla kundër qytetarëve në këtë Gjykatë. Vendimi është marrë në mbledhjen e kësaj jave të këshillit të Ministrave dhe vlerësohet se falë tij do të përfitojnë në total rreth 4,800 qytetarë, në një çast që Gjykata e Lartë ka nisur një process të mirëfilltë për shkarkimin e dosjeve me vlerë të vogël

Gjykata e Lartë ka ngritur një strukturë të posaçme të përbërë nga 12 Nëpunës për Uljen e Çështjeve, e cila tashmë ka kryer një proces inventarizimi të hollësishëm të rreth 23,000 çështjeve të prapambetura. Scan television ka zbardhur analizën e kësaj strukture, e cila ka shërbyer si bazë për kategorizimin e çështjeve në grupe prioritare.

Falë kësaj analize Gjykata e Lartë ka mundur të filtrojë dhe gjykojë çështjet të cilat nuk plotësojnë kushtet formale për t’u shqyrtuar, përfshirë rekurset e paraqitura jashtë afatit ligjor, rekurset për çështjet ku vlera e padisë nuk kalon 40 – fishin e pagës minimale (në fushën administrative) ose vlerën e padisë nën 150.000 lekë (në fushën civile), rekurset për të cilat është paraqitur kërkesa për heqje dorë etj.

Kategoritë e çështjeve të përpunuara paraprakisht nga NUNÇP për trajtim nga Këshilltarët Ligjorë, përfshijnë edhe çështjet e ardhura për herë të dytë ose të tretë në Gjykatën e Lartë apo rekurset e paraqitura ndaj një vendimi të ndërmjetëm, si p.sh faza e parë e pjesëtimit, sigurim padie, si dhe vendimet jopërfundimtare ( kur gjykata e apelit ka vendosur mospranim ankimi apo kthimin e akteve).

Në kategoritë prioritare administrative, NUNÇP kanë përpunuar paraprakisht edhe çështjet për të cilat gjykata e apelit ka vendosur prishjen e vendimit të gjykatës së shkallës së parë; çështjet e gjykuara si shkallë e parë në apel: si aktet normative, vendimet e ATP-së, vendimet e Komisionit të Shërbimit Civil apo çështjet ku është vendosur pezullimi i ekzekutimit të vendimit të formës së prerë. Gjithashtu, janë përpunuar dhe çështjet e kategorisë Marrëdhënie Pune dhe Sigurime Shoqërore, sipas vitit të regjistrimit 2015.

Për t’u theksuar është se këto lloj çështjesh, ku përfshihen padi për vitet e pensioneve apo të punësimit, numërohen me qindra e me mijëra e nëpër arkivat e Gjykatës së Lartë.

Gjë që mund të lehtësojë stikun prej mbi 31 mijë dosjesh, por jo t’I japë zgjidhje përfundimtare. Vetë Gjykata e Lartë ka bërë me dije se stoku ka prirje të rritet për shkak të rekurseve të reja. Ajo fajësoi për këto rekurse avokatët e papërgjegjshëm, por edhe institucionet shtetërore të cilët bëjnë rekurse të panevojshme.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.