Shteti me më shumë Call Center-a në botë i druhet automatizimit
Që në fillim të viteve 2000, Filipina ka shtuar mbi 1 milionë vende pune falë kompanive të huaja që kanë zhvendosur shërbimin e klientit dhe shitjet përmes telefonatave në këtë vend.
Por teksa një valë automatizimi kërcënon punësimin në këtë industri, kompanitë po përballen me një sfidë tjetër, atë të ritrajnimit të punëtorëve për të plotësuar kërkesën për punë të specializuara në fusha si shëndetësia, bankat, financa dhe siguracionet.
“Sfida më e madhe janë njerëzit. Na mungojnë njerëz me ekspertizën teknike dhe eksperiencën për të kënaqur nevojat që lindin”, thotë Jojo Uligan, president i Shoqatës që mbledh ndërmarrjet në këtë industri.
Filipina është destinacioni kryesor për delokalizimin e bizneseve, pasi ka paga më të ulëta, afrimi kulturore me perëndimin dhe një popullsi me 100 milionë banorë, shumica e të cilëve flet rrjedhshëm anglisht.
Por me zhvillimin e teknologjisë, tashmë kompjuterat janë në gjendje të riprodhojnë shumë prej funksioneve që bëjnë njerëzit, përfshirë edhe marrëdhëniet me klientin. Një studim i fundit tregon se më shumë se gjysma e punëve të transferuara jashtë mund të humbasë në disa vite, nëse nuk bëhet një ritrajnim cilësor i forcës punëtore.
Kompanitë po kërkojnë gjithmonë e më tepër punonjës që janë të mirëedukuar, me eksperiencë dhe të kenë një ekspertizë teknike të mirë.
Shqetësimi është i dukshëm dhe projeksionet tregojnë se të ardhurat deri në vitin 2022 do të rriten me vetëm 8%, ndryshe nga normat e rritjes në të shkuarën që tejkalonin 10%.
Për këtë arsye, disa nga kompanitë më të mëdha të outsourcing në botë do të mblidhen këtë muaj në Filipine për të krijuar një plan që të kundërveprojë impaktin e automatizimit.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.