Shtim i hapësirave për parkim me pagesë – Tirana Parking hap tenderin për Master Planin: Identifikim i rrugëve dhe zonave ku do paguhet
Tirana Parking, kompania që administron Shërbimin e Parkimit Publik me Pagesë në kryeqytet synon të zgjerojë hapësirat për parkimin me pagesë të automjeteve. Ky dikaster ka hapur një tender me vlerë 12.46 mln lekë, për hartimin e Master Planit dhe Planit të Biznesit për Parkimet në Tiranë, që ka për qëllim hartimin e një dokument i cili përmban një analizë të të gjitha aspekteve të parkimit publik, në mënyrë që duke u bazuar mbi rezultatet e këtij studimi, Tirana Parking të ketë mundësi për vendimmarrje të mëtejshme, në lidhje me zhvillimin e mëtejshëm të shërbimeve të parkimit. Kompani që do të hartojë këtë dokument, pasi të bëjë analizës e situatës aktuale dhe dhe nevojat e identifikuara, do të duhet të propozojë ndërhyrje specifike për adresimin e këtyre nevojave.
Sipas dokumenteve që shoqërojnë procedurën tenderuese, këto ndërhyrje duhet të përfshijnë, por jo të kufizohen, në identifikimin e rrugëve të reja ku mund të shtrihet shërbimi i parkimit me pagesë. Gjithashtu, duhet të bëhet identifikimi i zonave të reja ku mund të shtrihet shërbimi i parkimit për rezidentë; i atyre që mund të kthehen në sheshe parkimi, si dhe zonat ku mund të ndërtohen parkime nëntokësore. Nevoja për këto ndërhyrje sipas Tirana Parking bazohet në faktin se lëvizja me biçikleta në disa prej rrugëve kryesore të zonës qendrore të Tiranës ka theksuar edhe më shumë problemet e hershme të mbingopjes së automjeteve të parkimit.
Nga ana tjetër, vendosja e shërbimit të parkimit me pagesë në rrugët kryesore dhe sekondare në brendësi të Unazës së Mesme ka lehtësuar qarkullimin dhe ka zgjidhur problemin e parkimit afatshkurtër, por, në të njëjtën kohë, e kanë kanalizuar kërkesën për parkim afatgjatë brenda blloqeve të banimit. Aktualisht, në Bashkinë e Tiranës gjenden mbi 200,000 automjete ose rreth 250 automjete për 1,000 banorë. Ndërkohë, Tirana Parking administron në total 7270 parkime në rrugë,1429 parkime në sheshe dhe 5841 parkime për rezidentë.
Ola Mitre/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.